• Hè ues setmanes tanben ataquèc uns brinhons en Bausen.

Er os Goiat, liberat en Pallars en marc deth programa Piroslife er an 2016, dempús de passar er ostiu en França tornèc tara Val d’Aran ena tardor tà ivernar, coma dejà hec eth passat iuèrn. Hè ues setmanes gessec der ivernatge e marchèc tà França.

Ath sòn pas cap a França, s’enregistrèc eth prumèr atac de Goiat ena Val d’Aran, concrètaments en Bausen hè ues tres setmanes, a on provoquèc danhs a dus brinhons.

Entre eth dissabte e dimenge passat, 14 e 15 d’abriu, auec lòc era dusau predación damb er atac a ua cavala tanben en municipi de Bausen. Gràcies ath colhar damb senhau GPS que pòrte er os Goiat se localizèc aguest os ena zòna pendent aumens tres ores.

Tecnics deth Conselh Generau d’Aran se desplacèren ath lòc des hèts entà documentar es danhs, cercar excrements, … der os damb era ajuda de gossets, e installar camèras automatiques entà fotografiar-lo se torne tara zòna. Toti es indicis semblen indicar qu’era cavala siguec mòrta per atac der os.

En paraules deth sindic d’Aran, Carlos Barrera: “A fauta de confirmar eth darrèr atac de Goiat ara cavala de Bausen, se demostrarie era agressivitat d’aguest os pr’amor qu’entre er atac de França e eth de Bausen an passat sonque 5 dies”.

Vielha, 17 d’abriu de 2018

Conselh Generau d’Aran: Núria Sanjuan