• Es jogadors e er equip tecnic arribèren eth passat dimenge, 18 d’agost, e marchen deman, dia 24

• Eth conselhèr d’Espòrts, Héctor Manero, a afirmat que ei tot un aunor acuélher aguesta concentracion esportiua

Er equip UCAM Murcia Club de Basquet profite es darrèri dies deth sòn stage de pretemporada ena Val d’Aran entà contunhar entrenant dur enes installacions deth Palai d’Espòrts de Vielha.

Es jogadors e er equip tecnic arribèren eth passat dimenge, 18 d’agost, e marchen deman, dia 24, entà èster prèsti tath prumèr compromís dera pretemporada: un partit d’entrenament còntra er ICG Força Lleida qu’aurà lòc aguest dimenge ena localitat de Monzón.

Pendent aguesta setmana, er equip a estat trebalhant intensament jos es ordes deth sòn entrenador, Sito Alonso. Un professionau qu’a un ligam fòrça especiau damb era Val d’Aran pr’amor que hè mès de quinze ans que, cada ostiu, realize aciu eth prestigiós Campus Sito Alonso de basquet.

Ena visita der equip ara sedença deth Conselh Generau d’Aran, qu’a agut lòc aguest meddia, eth conselhèr d’Espòrts, Héctor Manero, a afirmat que ei tot un aunor tara Val d’Aran acuélher era concentracion esportiua d’un equip coma er UCAM Murcia e, dempús d’interessar-se per coma an anat es entrenaments aguesti dies, a desirat molta sòrt tara temporada a toti es jogadors.

Pera sua part, Sito Alonso a mostrat eth sòn arregraïment ara institucion aranesa pera sua collaboracion e a remarcat eth plaser que supause entà eri poder entrenar en nòste territòri.

Er hèt de èster lotjadi en otèl Tryp de Vielha, a pògui mètres deth lòc d’entrenament, e es temperatures moderades d’aguesta darrèra setmana, a facilitat fòrça era practica esportiua d’aguesti professionaus. Maugrat a que non an agut massa temps liure entre entrenaments, òc qu’an podut gésser dera rotina realizant d’auti espòrts coma eth kayak.