FOTO: JAN ROLE

Eth passat dissabte, dia 2 d’agost, debanèc era 2au edicion d’Era Nocturna Vielha, corsa que se desvolopèc pes carrèrs de Vielha damb diferentes pròves:

– Corsa de 5 e 10 km (2 torns sus un circuit de 5 km)
– Caminada de 5 km.

Enguan preneren part ues 600 persones, 200 mès qu’en debut dera competicion er an passat. Toti poderen participar en Era Nocturna, en tot caminar o en tot córrer

Ena corsa longa de 10 Km, participèren 220 atletes, a on Iván Espílez (EKKE), s’imposèc a Imanol Rojo (Alpino Uzturre) e a Sergi Hidalgo (Runners Tarragona) que demorèren dusau e tresau respectivaments. Deth temps qu’ena categoria femenina, Mireia Sosa (Runners Tarragona) guanhèc peth deuant de Meritxell Bonet (Lleida UA) e de Raquel Marqués (EKKE).

Per çò qu’ei dera corsa cuerta de 5 Km, participèren 100 atletes, a on s’imposèren Pol Blas (Nou Barris) e Laia Resa (Igualada). Era joena aranesa, María Iglesias, demorèc en ua meritòria dusau posicion.

Ath long dera dimenjada, se realizèren charrades sus nutricion esportiua e de materiau esportiu, atau coma era possibilitat de gaudir d’eth “Pinxo-Runner”, a on s’aufric ua rota per diferenti bars ara fin de degustar diferenti pinxos.

En paraules deth conselhèr d’Espòrts d’Aran, Luís Carlos Medina, “Era Nocturna Vielha s’a assolidat coma un eveniment popular e esportiu, en tot convertir-se en un referent tant entàs residents dera Val d’Aran coma entàs persones que mos visiten” eth conselhèr a ahijut “Era Nocturna ei ath delà un eveniment familhar fòrça interessant tant entà majors coma entàs petiti”.

Era Nocturna de Vielha ei ua activitat realizada peth Club Atletic Val d’Aran (CAVA) que compde damb era collaboracion entre d’auti, deth Conselh Generau d’Aran.