• Era 36au edicion dera Marxa Beret aurà lòc eth 22 de març

• Es pròplèus dies informaram de toti es detalhs dera programacion

Eth pròplèu 22 de març de 2015 se celebrarà era 36au edicion dera Marxa Beret que s’auie de celebrar eth passat 1 de hereuèr mès s’ajornèc per causes meteorologiques. Era carrèra prepause 3 distàncies: 10, 21 e 42 km que transcorren peth Plan de Beret a 1.850m d’altitud e que passen peth pòble de Montgarri.

Era Marxa Beret ei era mielhor pròva esportiua de hons d’Espanha, puntuable entath circuit EUROLOPPET, qu’englobe es melhores carrères europèes d’aguesta modalitat.

A compdar deth 1978 era Marxa Beret se ven celebrant e mielhorant tant era qualitat coma eth numèro d’inscriti. En tot auer en aguesti moments ath torn de 1000 participants.

Aguesta edicion, era preparacion ei mès intensa a causa dera adaptacion dera competicion as exigéncies que compòrte era organizacion des Campionats d’Euròpa de Longa Distància donques qu’era Marxa Beret a estat era sedença escuelhuda entara organizacion d’aguest eveniment entara sason 2015/2016. Ath delà, era carrèra aranesa ei puntuable FIS e ei laguens deth calendari Euroloppet qu’amasse es marches populares d’esquí de hons mès importants d’Euròpa.

Era Marxa Beret atrè a participaires de naut nivèu coma es esquiadors dera Reau Federacion Espanhòla Espòrts d’Iuèrn (RFEDI) Laura Orgué e Ioseba Rojo (guanhador dera passada edicion). Destacar qu’Orgué, que tanben a guanhat en bèra ua escadença era Marxa Beret, hè concurréncia ena Copa deth Mon FIS e era passada sason demorèc 10au enes 30 km estil liure des JJOO de Sochi.

Es recorreguts mès cuerti era Marxa Beret tanben atrèn a grana quantitat de familhes e grops d’amics que participen de manèra populara.

Era Marxa Beret ei promoiguda peth Conselh Generau d’Aran, Baqueira Beret e er Ajuntament de Naut Aran damb era collaboracion dera Associacion Volentaris Val d’Aran, Audi, Foment Torisme Val d’Aran, Deputacion de Lleida, Ajuntament de Vielha e Mijaran, Salomon, la Caixa, Powerade, Xchanging, AECC, Roche- Posay, Coca-Cola, Pompièrs d’Aran, Aran Salut, Mossos d’Esquadra, INS d’Aran, Montgarri Outdoor, Hormaran, Construcciones Pena, ath delà dera Reau Federacion Espanhòla Espòrts d’Iuèrn e era Federacion Catalana Espòrts d’Iuèrn.

Inscripcions:

Se daurirà un nau procès d’inscripcion entad aqueri naui que volguen participar eth 22 de març.

Aqueri que ja an inscripcion e assistisquen en març se conservarà era inscripcion, vos informaram deth procediment a seguir.

Entad aqueri que ja an inscripcion e non poguen assistir ena naua data, metem a disposicion dues alternatiues:

– Conservar era inscripcion entara pròplèu edicion, 37au Marxa Beret deth 2016
– Se non i a d’aute remèdi se retornarà era inscripcion en tot respectar es condicions estipulades en reglament.

Eth brèu detalharam eth procediment a seguir en quinsevolhe des casi.