Era grana escomesa dera edicion d’enguan dera carrèra ei era Challenge, qu’ei era soma des tempsi des tres carrères mès longues, damb un totau de 75 quilomètres.

Vielha, 14 de junh de 2016.- Eth Conselh Generau d’Aran, acuelhec era presentacion deth Trail Carlac 2016, que se celebrarà deth 17 ath 19 de junh, ena zòna de Quate Lòcs ena Val d’Aran. Era presentacion compdèc damb era preséncia deth vicesindic d’Aran e conselhèr d’Espòrts, Luís Carlos Medina; acompanhat dera bailessa de Bausen, Veronique Fontan; Andrés Cortés, còsso der ajuntament de Les; e eth director deth Trail Carlac, Juli Sala.

Eth vicesindic d’Aran, Luís Carlos Medina, destaquèc ena presentacion eth trabalh de superacion dempús de tres ans qu’an hèt es organizadors dera carrèra. Medina, ponec en valor eth hèt qu’era Val d’Aran destaque tanben damb prepauses que van mès delà d’un eveniment esportiu o ua carrèra de montanha, coma ei eth cas deth Trail Carlac, qu’enguan ei mès potent que jamès e que li cau veir tanben damb era promocion toristica, era natura, es montanhes, e evidentaments era activitat esportiua.

Eth director dera carrèra, Juli Sala expliquèc es novetats deth Trail Carlac d’enguan, que somen enquia cinc carrères en tres dies consecutius.

Eth diuendres 17 de junh s’a organizat eth Sprint Vertical Night, ua pujada nocturna en pòble de Canejan de 2 km e 400m de desnivèu positiu.

Eth dissabte 18 de junh aurà lòc eth Trail Quate Lòcs de 43 km e 3.100 m de desnivèu positiu, era mès longa de totes. Era gessuda ei tàs sèt deth maitin damb un recorregut pes pòbles de Les enquia Canejan, Pontaut, pujada a Bausen, Bòsc de Carlac e Tuc des Canaus, enquia era Bòrda deth Cric, descenuda enquia Bossòst entà préner eth Camin d’Espaliàs e era arribada a Les.

Eth dimenge 19 de junh aurà lòc eth Trail Carlac concebut coma ua carrèra de montanha que se desvolòpe sus tres recorreguts damb distàncies variades e desparièrs nivèus de dificultat.

Era mès cuerta ei eth Trail Vila de Les, de 11 km e 600 m de desnivèu positiu damb un recorregut que gesserà de Les, pujarà a Bausen, passarà peth guardader de Les e baisharà nauaments enquia Les. Aguesta carrèra ei perfècta entad aqueres persones que vòlen iniciar-se enes carrères de montanha.

Era rota mieja ei eth Trail Bòsc de Carlac damb 21 km e 1.200 m de desnivèu positiu. Eth recorregut de Les, puge a Bausen, seguís peth Bòsc de Carlac e baishe entà Les nauaments.

E coma novetat, eth Trail Deth Montlude, de 30 km e 2.200 m de desnivèu damb un recorregut que ges de Les enquiara pujada deth Tuc des Neres e Montlude entà baishar peth lac de Lauajò enquia Bordius, a on contunharà peth Camin dera Cambra enquia Les.

Ua des novetats a destacar d’aguesta edicion ei era Challenge, qu’ei era soma deth temps des següentes carrères: Sprint Vertical Night (2 km), Trail Quate Lòcs (43 km) e eth Trail Deth Montlude (30 km). Un totau de 75 km e més de 5.700 m de desnivèu.

Es organizadors deth Trail Carlac, an previst ath delà tota ua agenda d’activitats restacades damb eth running en collaboracion damb es ajuntaments per a on passe era carrèra, que destaque entre eth un cross infantil dirigit a menors de dètz ans, eth dissabte 18 de junh pera tarde.

Es trofèus que se liuraràn son hèti a man per mestieraus aranesi damb un significat istoric e culturau restacat damb era Val d’Aran.