Vielha, 7 de març de 2018.- Eth Conselh Generau d’Aran a acuelhut ua jornada organizada amassa damb era ACM (Associacion de Municipis de Catalonha) entà explicar es novetats dera Lei de Contractes as cargues elegidi e tecnicians e tanben entà hèr difusion des diferenti acòrds laguens deth marc dera Centrau de Crompes deth mon locau.

Eth pròplèu 9 de març entrarà eth vigor era naua Lei de Contractes deth Sector Public que supausarà era aplicacion de naui procediments per çò qu’ei era contractacion locau. “Aguesta lei supausarà era entrada en vigor d’un nau marc juridic e per aguest motiu credem qu’ei basic e imprescindible qu’es elegidi e es tecnicians locaus agen coneishença de toti es sòns efèctes” a explicat eth Secretari Generau dera ACM, Marc Pifarré. Motiu peth que s’amien a tèrme mès de 50 sessions entà toti es conselhs comarcaus de Catalonha en sessions diferenciades entà tecnicians e entà elegidi.

Pera sua part, eth sindic d’Aran, Carlos Barrera, a manifestat “qu’era ACM demòstre èster ath pè e ath servici deth territòri, damb sessions coma aguesta en Aran”. Barrera a avalorat fòrça positiuaments era relacion establida entre eth Conselh Generau e era ACM, que ja hè mès de 6 ans que dure e qu’a hèt qu’es ajuntaments aranesi e eth Govèrn d’Aran poguen profitar es avantatges qu’açò represente, donques es municipis petiti se pòden beneficiar des condicions qu’artenhen es mès grani”.

Actuauments 5 ajuntaments dera Val d’Aran e eth madeish Conselh Generau d’Aran, crompen bèth producte o servici dera Centrau de crompes deth mon locau.

Eth president deth Fòrum Comarcau, Jordi Xargay, a assegurat que “coma entitat municipalista mès importanta deth país, defenem ua vision a on es Conselhs comarcaus o eth Conselh Generau d’Aran son de besonh entà articular eth territòri e èster garantia entar accès des servicis as ciutadans”.

Er objectiu des jornades ei conéisher es novetats, transméter era metodologia d’elaboracion de plecs de prescripcions tecniques, fomentar era coneishença dera contractacion sociauments responsabla.

Ara madeish eth 82% des ajuntaments catalans se beneficie dera Centrau de Crompes deth mon locau.

Aguesta ei era siesau edicion des sessions qu’era ACM amie a tèrme peth territòri catalan entà explicar les avantatges dera Centrau de crompes deth mon locau. Actuauments aufrís 11 productes ath delà d’un milèr d’ens de tota Catalonha. Per çò qu’ei des ajuntaments, 775 crompen bèth producte o servici coma electricitat, gas, assegurances, equipes informatiques, mobilitat sostenible, equipes d’impression, maquinària tecnica, papèr, DEA’s e ascensors.

Es entitats que crompen bèth producte o servici a trauès dera Centrau de crompes deth mon locau s’asseguren que complissen damb era Lei de Contractes qu’entrarà eth vigor eth pròplèu 9 de març, donques, artenhen era maximala seguretat juridica. Tanben artenhen un estauviament de procediments. De mejana triguen 26 dies a compdar de que contracten eth servici enquia disposar-ne. Er estauvi economic tanben ei considerable, donques de mejana artenhen uns estauviaments d’un 10% des tarifes normaus, en tot arribar ath 40% ena mantenença d’ascensors.

Er objectiu principau dera Centrau de crompes ei qu’es municipis mès petiti se poguen beneficiar des condicions qu’artenhen es mès grani. Atau madeish, tostemp se cerque favorir l’economia locau damb er accès de pimes a lòts territoriaus.

Fin finau, era Centrau de crompes promò era mobilitat sostenible. Per aguest motiu, eth darrèr acòrd marc aufrís diferentes modalitats de veïculs electrics, ja siguen coches, biciclètes o mòtos de baish consum o electriques. Tanben s’aufrís era crompa agregada de punts de recarga.