Aguest pròplèu dimenge, dia 19, se celèbre eth Dia contra eth càncer de popa. Damb aguest motiu era Junta Locau dera AECC d’Aran a programat diferentes actes:

– Dimèrcles, 15 d’octobre, entàs 20h00: Charrada sus era hemna e eth càncer de popa damb era Dra. Marisa Pon, cirurgiana. Mastèr en senologia e patologia mamaria. Ena sala d’actes deth Conselh Generau d’Aran (Passeg dera Libertat, 16.Vielha)

– Dimenge, 19 d’octobre, entàs 12h30: Caminada contra eth càncer de popa. Ena Plaça dera glèisa de Vielha.

Aguesti actes an un doble objectiu. D’un costat, mobilizar ara societat ena luta contra eth càncer de popa e captar hons entà auançar ena investigacion entà hèr-li tèsta. E, per un aute, aufrir informacion multidisciplinària sus aguesta malautia, damb enfasi e difusion des programes e servicis qu’era AECC met ara disposicion des persones afectades e a familhars.

En Espanha, cada an, 22.000 persones son diagnosticades de càncer de popa, lèu totes eres son hemnes, ei significativa era donada: 1 de cada 8 hemnes aurà càncer de popa ath long dera sua vida.