Vielha, 24 d’agost de 2018.- Profitant era presentacion oficiau dera Corau Es Paoesses era Associacion Es Paums a hèt a conéisher es activitats que pòrte a tèrme e es sòns projèctes.

Era Corau Es Paoesses qu’ei un grop de cantaires damb anima aranesa que a possat lèu de manera espontanèa en nòste parçan.

Estan passat er istoric grop de musica aranesa Es Paums acompanhèren era Missa de Hèsta Major de Vilamòs eth 15 d’agost, coma ei abituda des de hè bères anades.

En aquera escadença demanèren volontaris entà cantar es cants dera Missa en aranés.

Demorèren estonadi, perque et dia fixat entà ensajar se trapèren damb ua ventea de hemnes que volien cantar.

Ère un grop de persones aficionades damb ganes de cantar de Vilamòs, dera Val e de dehòra que passaue es sues vacances en nòste país.

En quate dies premaniren es cants dera Missa e estreèren es Gòis de Sant Ròc de Vilamòs ua composición poetic musicau damb letra de Jèp de Montoya e música de Jaume Masana Castet.

Era experiencia siguec tan gratificant que decidiren de torna’c a repetir enguan e fondar era Corau Es Paoesses tà dar-li continuitat damb d’auti concèrts.

Atau donques, jos era dirección musicau de Lucia Mas, cantaira aranesa damb experiéncia en amiar grops de cantaires an premanit entada aguest estiu quate actuacions ena Val: Petit Concèrt ena Residéncia Sant Antòni de Vielha, Missa cantada en aranés ena Hèsta Major de Vilamòs, Concèrt en Museu Çò de Joanchiquet de Vilamòs en collaboracion damb era Corau Margalida e Missa cantada en aranés ena Residéncia Sant Antoni de Vielha.

Pendent aguest an eth Grop Es Paums que ei eth pairin d’Es Paoesses s’a virat en ua Assocacion sense ànim de lucre entà promòir era musica, era lengua e era cultura aranesa, que a promoigut  accions en ambit dera cultura coma era revirada ar aranés de obres coma Alicia en País des Maravilhes, era composicion des Gòis a Sant Ròc de  Viamòs, era creacion deth videoclip Net de Huec, era edición d’un CD damb música aranesa, eth pariatge deth musician aranés Jaume Masana “CASTÈTH” e er aumenatge ath filològ Joan Coromines.

En ambit esportiu an organizat era Corsa Populara Lairissa Bike de BTT e eth Torneg de Tenis Taula de Vilamòs.

En apartat de promocion toristica an amiat a bon tèrme era campanha Vilamòs eth pòble mes polit de Lheida, que artenhec aguest titol autrejat peth Diari Segre, era creación der slogan e eth logotipe “Vilamòs, Tiò, natura e cultura”, e eth Concors de Fotografia Tiò natura e cultura.

En capitol dera lengua era Associacion Es Paums amie eth Grop de Convèrsa en aranés dera Universitat de Lhèida, collabore damb er IEA Acadèmia aranesa dera lengua occitana. Ath madeish temps publique articles en aranés de manera regulara en diari digital Jornalet.

Ath delà Es Paums balhen supòrt coma tutors enes corsi on-line tà apréner aranés der Institut Aranés e ath Servici de Supòrt linguistic aranes.cat. Era Associacion Es Paums tanben hèn de correctors de aranés des articles dera revista científica Sapiéncia.

Es Paums collaboren damb era candidatura dera Val d’Aran Patrimòni dera Umanitat.

En apartat dera religión an promoigut damb èxit era campanha tà entronizar era imatge de Sant Ròc representada en ua talha der artiste de Vitoria Antonio Garcia y Fernández de Acilu, escultor e policromiste.

Tant Es Paoesses coma era Associacion Es Paums an compdat des de eth prumèr moment damb eth supòrt der Ajuntament de Vilamòs e deth Conselh Generau d’Aran.

Mès tot açò que son projectes que ja marchen e per aquerò era Associacion ja trebalhe en projèctes tar an que ven coma, collaborar en era celebracion deth centenari dera mòrt deth poeta aranés Josep Condó  en tot méter musica a bèth un des sòns tèxtes, organización  des actes de commemoracion deth 45au aniversari dera filmacion en Vilamòs dera pelliculla “Un hombre como los demás” deth director Pedro Massó, commemoracion deth 45au aniversari deth prumèr concèrt de Es Paums, era organización er an que ven d’ua expedicion des de Aran enquia Sant Bertrand de Comenges tà hestejar eth Jubilèu de 2019, o era revirada ar aranés de beri comics deth personatge Tintin de Hergé.

Mès eth projècte més inmediat qu’ei hèr a créisher e consolidar era Corau Es Paoesses, ua iniciatiua musicau que a possat coma un misharnon de manèra espontanèa coma creishen es misharnons quan era térra ei arrica e ben suenhada coma era deth nòste país.