Vielha, 8 de gèr de 2017.- Era Val d’Aran a mantengut ua fòrça bona aucupacion otelèra pendent es dues setmanes des hèstes de Nadau, segontes informèc aué era conselhèra de Torisme d’Aran, Anna Díaz, damb chifres qu’an arribat ath 86% d’aucupacion otelèra era prumèra setmana, a compdar deth dia 25 de deseme, e de 72% ena dusau setmana des hèstes, en tot coïncidir damb er an nau. Es chifres artenhudes son es quaus proporcionen a Torisme Val d’Aran es pròpris establiments otelèrs e que se comptabilize en eth tota era Val d’Aran.

Era conselhèra Anna Díaz, qualifiquèc es chifres de “fòrça, fòrça bones entara Val d’Aran, pr’amor auer agut quauqui dies de mau temps, mès damb 150.000 esquiaires en Baqueira Beret, e en tot auer en compde qu’era gent sòl lotjar-se pròp dera estacion, es resultats demòstren qu’era aucupacion otelèra a beneficiat a toti es establiments, des de Naut Aran enquiath Baish Aran, a on era aucupacion a aumentat”. Díaz, a soslinhat que “es enterpreses e establiments restacadi damb eth sector toristic, coma es de guides de montanha, comèrci e restaurants, tanben an agut uns fòrça boni dies de servici”. Era conselhèra de Torisme afirmèc que s’a pogut gaudir ath 100% des equipaments toristics dera Val d’Aran.

Era conselhèra Anna Díaz, a destacat qu’era percepcion tant des empresaris coma deth personau des burèus de Torisme a estat fòrça bona.

En çò que tanh as previsions entath rèsta dera sason, Anna Díaz, soslinhèc que “I a espessors de nhèu e Baqueira Beret pòt aufrir era activitat de nhèu en plees condicions, qu’ei eth principau recors toristic dera Val d’Aran en iuèrn, amassa damb era arribada de toristes estrangèrs e sustot de visitants francesi en mes de hereuèr, hè a pensar qu’es establiments toristics dera Val d’Aran poderàn trabalhar fòrça “.

Fin finau, Anna Díaz, expliquèc qu’era pròplèu setmana era Val d’Aran participarà un an mès en FITUR, en tot compartir stand damb era Agéncia Catalana de Torisme, a on se presentarà coma novetat eth nau centre d’interpretacion de fauna qu’amassa damb eth Refugi dera Artiga de Lin, refortilharàn aguest lòc emblematic dera Val d’Aran damb era natura coma principau producte toristic, e que tanben se trabalhe entà poder auer prèst entà Sant Joan eth centre d’interpretacion des hèstes deth Huec en Les.