Alidé Sans realizarà eth sòn prumèr concèrt en Red Room KGB Bar de Naua York, a on per prumèr còp era cultura e era lengua aranesa seràn presents en un acte public en Estats Units

Vielha, 12 de abril de 2017.- Peth prumèr còp e damb eth sosten deth Conselh dera Diplomacia Publica de Catalonha, era lengua e era cultura araneses seràn protagonistes en un eveniment public enes Estats Units. Er eveniment se debanarà eth dia 22 d’abriu, velha de Sant Jòrdi, e se tierà en encastre deth programa d’activitats culturaus e literàries #BooksAndRoses #StJordiNYC organizat per Farragut Fund e Catalan Institute of America, damb eth sosten de DIPLOCAT e tanben der Institut Ramon Llull.

Alidé Sans, neishuda en 1993, a ja ua trajectòria assolidada coma cantautora en aranés. Es sues cançons an influéncies deth reggae, dera rumba e deth soul e an ua traça fòrça personau, que l’an amiat a èster presenta enes principaus hestenaus de Catalonha. Aguest ei eth sòn prumèr concèrt enes Estats Units, e se debanarà en Red Room KGB Bar de Naua York, entàs 21h. Era entrada ei gratuïta.

Era rèsta d’activitats de difusion dera cultura e literatura catalanes en Naua York (debats damb autors e traductors, recitaus de poesia, concèrts e animacions entà mainatges) començaràn deluns 17 d’abriu e s’esteneràn enquia dimenge 23. Se poderàn seguir a trauès des hilats sociaus, damb eth hashtag #StJordiNYC, especific entàs activitats de Naua York, e eth hashtag generau de #BooksAndRoses, qu’amasse totes es activitats organizades dehòra de Catalonha ar entorn deth 23 d’abriu.

Entà poder seguir ath detalh toti es eveniments restacadi damb libres e ròses que se debanaràn per tot eth mon enes dies a vier, en encastre d’ua celebracion qu’ei venguda internacionau, consultatz eth web www.booksandroses.cat

Info e foto: DIPLOCAT