Era CHE, en tot atier era demana deth Conselh Generau d’Aran, que recuelhie era aportacion des ajuntaments aranesi, a comunicat que coma organisme de conca iniciarà immediataments accions puntuaus de condicionament e restitucion dera traça der arriu Garona enes zònes periferiques ath nuclèu que non auien estat trabalhades enquiara. Es accions consistiràn ena restitucion des marges deth Garona e damb era retirada des rèstes de materiau qu’en aguesti moments encara se trapen en lhet der arriu. Tanben se haràn trabalhs d’eliminacion de vegetacion enes zònes de maximala densitat e que poguen èster un perilh en cas de naues avengudes.

D’aguesta manèra, eth govèrn deth Conselh Generau d’Aran ei plan satisfèt des acòrds que s’an artenhut damb era CHE. Es accions son previstes enes trams des pòbles de Tredòs, Salardú, Garòs, Gessa, Arties, Vielha, Arròs, Es Bòrdes, Bossòst, Les e Bausen. Es òbres seràn executades dirèctaments pera CHE, e eth sòn finançament correrà a cargue dera pròpria institucion laguens des sòns pressupòsti e executades coma organisme de conca.

En paraules deth Síndic d’Aran, Carlos Barrera “dempús des gestions realizades deuant dera CHE, era Delegación del Gobierno e deth Ministerio de Agricultura, Alimentación y Medio Ambiente en Madrid, aguesta naua inversion da respòsta a part d’aqueres demanes”.

D’aute biais, eth Conselh Generau d’Aran presentèc allegacions en tot hèr constar qu’er estudi tecnic sus eth flux preferent der arriu Garona ère anterior ar episòdi d’inundacions deth 18 de junh de 2013. Donques, damb era modificacion patida ena practica totalitat dera traça der arriu Garona, es estudis idraulics presentadi non èren valids en aguesti moments.

Era Confederación Hidrográfica del Ebro (CHE) a admetut aguesta realitat e ara ei pendenta deth nau estudi cartografic qu’a de realizar er Institut Cartogràfic i Geològic de Catalunya a trauès deth Departament de Territori i Sostenibilitat dera Generalitat de Catalonha.

Posterioraments, s’aurà de hèr un nau estudi idraulic ajustat ad aguesta cartografia. Serà alavetz, damb es donades obtengudes, que s’artenherà ajustar ara realitat dera traça der arriu Garona. Un aute element important der estudi ei que tanben contemplarà es òbres de defensa executades a compdar des inundacions.