Eth chef aranés, Marc Nus, deth restaurant “Era Coquèla” de Vielha premanic bombons d’esturion damb misharnons.

Es dies 25 e 26 de junh Berga acuelhec era Gastropirineus 2018, accion organizada damb er objectiu de dar protagonisme e méter en valor era codina, es productes e es professionaus deth sector dera restauracion de totes es comarques pirenenques de Catalunya, des dera Val d’Aran enquiara Garrotxa.

En aguesta tresau edicion s’a soslinhat eth potenciau gastronomic deth Berguedà, en tot plaçar-lo ena memòria de toti es assistents coma punt de referéncia.

Mejançant es jornades se preten estimular era innovacion, promòir era cultura alimentària, recuélher e difóner era coneishença de productors, elaboradors e codinèrs. Er objectiu ei melhorar era competitivitat des professionaus e es empreses deth sector enogastronòmic deth Pirenèu.

Parallelament, laguens de Gastropirineus i auec ua mòstra e degustacion de productes, demostracion dera elaboracion de plats dera codina des Pirenèus, presentacion de naui plats e productes, escambi d’idèes, debat e reflexion e sessions de codina en dirècte.

Gastronomia aranesa en Gastropirineus 2018

Laguens der espaci “Es misharnons e era sua aplicacion ena codina”, damb eth coneishut micòleg catalan, Enric Gràcia, era gastronomia aranesa auec un papèr destacat enes jornades, damb era demostracion de codina en dirècte deth chef aranés, Marc Nus, deth restaurant “Era Coquèla” de Vielha que premanic bombons d’esturion damb misharnons.

Vielha, 28 de junh de 2018

Conselh Generau d’Aran: Núria Sanjuan

Fotos: Gerard Viló