Vielha, 20 d’abriu de 2018.- Aguesta setmana a debanat en Conselh Generau d’Aran era session dera Comission Assessora der Auviatge dera Val d’Aran.
Era Comission Assessora a tractat diuèrsi aspèctes restacadi damb er auviatge aranés, coma es modificacions deth projècte de restauracion deth Castèth de Pijoèrt de Les. Eth sindic d’Aran, Carlos Barrera, a explicat qu’ena Comission s’a acordat demanar ua definicion interpretatiua des runes deth castèth e deth que li cau rebastir entà poder corbir tota era tor. Seràn es tecnicians es encargadi d’elaborar-la, entà qué era reconstruccion sigue çò de mès semblanta ara originau possible.
D’auta banda, era Comission tanben s’a aucupat deth projècte de renfortiment e eth bastiment dera estructura d’accés e restauracion entà hèr visitable eth campanau dera glèisa de Sant Andreu de Salardú. En aguest sentit eth sindic d’Aran, a dit que se harà un estudi der estat des hustes existentes ena estructura deth campanau. En çò que tanh a hèr-lo visitable, Barrera a manifestat qu’eth moment en qué açò sigue possible, seguraments se limitarà a 10 o 12 eth nombre de persones des grops que poderàn accedir ath campanau entà non sobredimensionar era estructura. Er estudi, serà elaborat per arquitècte e director dera School of Architecture dera UIC (Universitat Internacionau de Catalonha) de Barcelona, Josep Lluis i Ginovart.
Eth bastiment d’ua bassa d’aigua entara produccion de nhèu artificiau en Beret ei un aute des aspèctes que s’an tractat pendent era Comission Assessora der Auviatge. Era bassa se bastirà integrada damb er entorn naturau, ena pista que condusís tà Montgarri, ath costat deth parcatge de Beret, entà profitar er aigua deth desgèu. Era comission a recomanat qu’eth bastiment age en compde era possibilitat de trobar ath long deth bastiment, rèstes arqueologiques d’interès, pera proximitat damb eth pòble de Montgarri.
Un des punts mès importanti dera Comission der Auviatge a estat era avaloracion der estudi informatiu deth Ministerio de Fomento deth projècte de condicionament dera carretèra N-230 de Sopeira ta França, en tram que va a compdar dera boca nòrd deth tunèl de Vielha tà Aubèrt. Carlos Barrera s’a referit en aguest punt en tot afirmar qu’era Comission der Auviatge a refusat totes es alternatiues presentades peth ministèri, donques totes eres compòrten ua fòrta afectacion visuau enes nuclèus urbans dera Val d’Aran, en tot arrebrembar que toti es nuclèus urbans d’Aran son catalogat coma BCIL (Ben Culturau d’Interès Locau).
