• Pendent aguesta Bilaterau, era prumèra damb eth nau govèrn dera Generalitat, se tractaràn ahèrs de transendéncia entà Aran eth finançament, e ahèrs tanhents ath desplegament competenciau en airaus coma espòrts, lengua e cultura o gestion deth territòri entre d’auti.

Eth pròplèu dimèrcles, 13 d’octobre, s’amiarà a tèrme en Barcelona era amassada dera Comission Bilaterau des govèrns dera Generalitat de Catalunya e eth Conselh Generau d’Aran, atau coma establís era Lei 1/2015 de Regim Especiau d’Aran, que ditz qu’aguesta comission s’a d’amassar aumens un còp ar an, e que s’amassèc per darrèr còp en gèr de 2020.

“Eth passat mes de seteme sollicitèrem ara Generalitat era celebracion d’aguesta Comission Bilaterau, era prumèra qu’amiaram a tèrme damb eth nau govèrn de Catalunya, e ena quau volem tractar ahèrs urgents entara Val d’Aran coma era aplicacion efectiva dera actualizacion der acòrd de finançament, era manca de recorsi destinadi ara lengua e cultura araneses, er estat dera C-28 o era problematica dera viuenda en territòri, entre d’auti”, explicaue era sindica d’Aran, Maria Vergés.

Era Comission Bilaterau deth Conselh Generau e era Generalitat ei er òrgan permanent de relacion entre andús govèrns, e qu’a coma objectiu estudiar, debàter e hèr prepauses entath desvolopament der autogovèrn d’Aran, definir es critèris e es mecanismes de collaboracion e coordinacion entre es departaments e es servicis dera Generalitat e deth Conselh, atau coma prepausar era transferéncia o delegacion de competències e acordar es traspassi de bens e servicis inerents as competències dera maxima institucion aranesa.

En aguest sens, era sindica d’Aran expressaue “era volentat deth govèrn d’Aran, atau coma dejà la’c trasladè ath President dera Generalitat pendent era sua visita ara Val d’Aran, d’encetar ua naua etapa damb er executiu catalan, entà daurir vies de dialòg e consens, dera leiautat e respècte institucionau ençà, entà hèr front a toti es rèptes qu’eth nòste territòri a per endauant”.