• Era consellera de Governacion dera Generalitat, Meritxell Borràs, e eth sindic d’Aran, Carlos Barrera, an presidit era dusau amassada dera Comission des dera sua creacion eth passat mes de hereuèr

• Era Comission Bilaterau ei er òrgan permanent de relacion entre es govèrns dera Generalitat e d’Aran, d’acòrd damb era Lei de regim especiau d’Aran

• Se constituirà un grop de trabalh entà estudiar e presentar prepauses entà desvolopar eth sistèma de finançament deth territòri dera Val d’Aran

Reunió Comissió Bilateral Generalitat-Aran

Era consellera de Governacion e Relacions Institucionaus dera Generalitat de Catalonha, Meritxell Borràs, e eth sindic d’Aran, Carlos Barrera, an presidit era reünion deth plen dera Comission Bilaterau Generalitat de Catalunya– Conselh Generau d’Aran, qu’agut lòc en Palai dera Generalitat de Catalonha.

Tanben an participat ena reünion dera Comission Bilaterau eth secretari generau deth Departament de Governacion e Relacions Institucionaus dera Generalitat, Francesc Esteve; eth secretari de Cooperacion e Coordinacion des Administracions Locaus, Joaquim Ferrer; eth delegat territoriau deth Govèrn en Naut Pirenèu e Aran, Albert Alins; eth secretari de Comunicacion deth Govèrn dera Generalitat, Josep Martí; eth director deth Burèu entath Desvolopament der Autogovèrn, Xavier Bernadí; e era cap deth Gabinet Tecnic deth Departament d’Economia e Coneishement, Susanna Bonastre. Coma representants deth Conselh Generau d’Aran, i an assistit eth vicesíndic d’Aran e conselhèr d’Administracion Publica, Finances e Coneishement, Luis Carlos Medina; eth conselhèr de Territòri, Tònho Boya, era conselhèra de Torisme e Desvolopament Economic, Anna Díaz, e eth secretari dera representacion aranesa, Enrique Pérez.

Aguesta ei era dusau reünion qu’a celebrat era Comission des dera sua constitucion, eth passat mes de hereuèr, en compliment dera Lei 1/2015, de hereuèr, deth regim especiau d’Aran. Damb aguesta dusau reünion se demòstre eth compromís dera Generalitat damb eth desplegament dera Lei deth regim especiau d’Aran, en aguest sens, era Comission a acordat fixar un calendari entath traspàs de competéncies dera Generalitat ath Conselh Generau d’Aran, ara fin de dota’c des plees competéncies que fixe era Lei. Enes dues reünions celebrades enquiara dejà s’an aprovat sies traspassi de servicis e de mejans.

Grop de trabalh entà negociar eth finançament

Era Comission Bilaterau a acordat era creacion d’un Grop de Trabalh entath Finançament d’Aran, que s’encargarà dera negociacion deth finançament especific previst entad aguest territòri. Eth Grop de Trabalh serà constituït per 3 representants dera Generalitat de Catalonha e 3 representants deth Conselh Generau d’Aran.

Eth Grop de Trabalh a coma objectius iniciar e desvolopar era negociacion relativa ara dotacion deth Hons entath Finançament deth Conselh Generau d’Aran; estudiar e prepausar eth procediment, era metodologia e eth calendari entara revision deth modèl de finançament, e analisar e prepausar es contenguts d’acòrd de finançament entre era Generalitat e eth Conselh Generau d’Aran entath 2015, d’acòrd damb es previsions legaus aplicables.

En paraules deth sindic d’Aran, Carlos Barrera, “aguest esperit de començar a trabalhar en nau modèl de finançament entà Aran, cossent damb çò que s’establic ena Lei d’aran, ei basic entara Val d’Aran, entath desplegament deth sòn autogovèrn e entath benéster des nòsti vesins e vesies, pera quau causa priorizam eth trabalh dirigit a establir un modèl de finançament estable e beneficiós entath país”.

Era Comission Bilaterau a acordat era ampliacion dera aportacion economica dera Generalitat entath finançament des competéncies transferides ena matèria de Salut. Er impòrt ei de 304.452,45€, “destinadi a incrementar e melhorar es servicis tant importants coma era cirurgia ortopèdica, traumatologia e oncologia” a soslinhat era conselhèra de Torisme e Desvolopament Economic, Anna Díaz.

Eth vicesindic d’Aran, Luis Carlos Medina, a hijut “damb aguest acòrd, aguest finançament s’incorporarà ath deth Conselh Generau d’Aran entàs pròplèus ans, çò que da garantia de contunhitat a un servici essenciau”.

Finauments, en torn dubèrt de paraules, eth sindic d’Aran, Carlos Barrera, e eth conselhèr de Territòri d’Aran, Tònho Boya, an informat ara Comission der estat des negociacions entre eth Departament d’Ensenhament dera Generalitat e eth Conselh Generau sus es òbres pendentes enes espacis exteriors dera Residéncia d’Òci e Temps Liure de Les que se traspassèc ath Conselh Generau d’Aran ena passada Comission Bilaterau.

“Demoram desbloquejar aguestes òbres pendentes çò mès lèu possible entà poder abilitar aguestes zònes exteriores coma parc infantil e cedir-lo ar Ajuntament de Les” a explicat eth conselhèr Tònho Boya.