• Pendent era reünion constitutiva dera Comission, presidida pera vicepresidenta deth Govern, Joana Ortega, e eth sindic d’Aran, Carlos Barrera, s’a acordat er ampliament de mejans en encastre der ensenhament e eth traspàs de foncions enes matèries de proteccion civiu, patrimòni, comèrç e artesania.
Era Comission Bilaterau Govern dera Generalitat – Conselh Generau d’Aran, constituïda d’acòrd damb era naua Lei 1/2015, deth 5 de hereuèr, deth regim especiau d’Aran, a aprovat es prumèrs traspassi de foncions e servicis que s’acòrden en compliment e desvolopament dera naua Lei, as pòqui dies dera sua vigéncia. Ena session d’aué s’a acordat er ampliament de mejans en encastre der ensenhament e eth traspàs de foncions enes matèries de proteccion civiu, patrimòni, comèrç e artesania per un impòrt de 240.000 èuros.
Era vicepresidenta deth Govern e titular deth Departament de Governacion e Relacions Institucionaus dera Generalitat de Catalunya, Joana Ortega, a presidit era reünion deth Plen dera Comission Bilaterau Govern dera Generalitat – Conselh Generau d’Aran que s’a celebrat ena sedença deth Conselh. Ara vicepresidenta l’an acompanhada eth delegat deth Govern en Naut Pirenèu e Aran, Albert Alins; eth secretari generau de Governacion, Lluís Bertran; eth secretari de Cooperacion e Coordinacion des Administracions Locaus, Marc Prat; eth director generau d’Administracion Locau, Jordi Souto, e eth secretari dera Comission e director deth burèu entath Desvolopament der Autogovèrn, Xavier Bernadí. Era representacion deth Conselh Generau, presidida peth sindic d’Aran e copresident dera Comission, Carlos Barrera, a estat integrada peth vicesíndic d’Aran e conselhèr d’Administracion Publica, Finances e Coneishement, d’Espòrts e Joenessa d’Aran, Luís Carlos Medina, eth conselhèr d’Empresa e Trabalh, Territòri, Salut e Benéster, Eduardo Valdecantos, era conselhèra de Torisme, Comèrç e Consum, Anna Díaz, eth conselhèr deth Conselh Generau d’Aran, Francés X. Boya, e e director executiu deth Conselh Generau d’Aran, Enrique Pérez.
Ampliament de mejans en encastre der ensenhament
Era Comission Bilaterau a acordat aué traspassar ath Conselh Generau d’Aran era titolaritat der Immòble, plaçat en tèrme municipau de Les, a on se plaçaue era Residéncia de Léser e Temps Liure, entath sòn usatge entàr exercici d’activitats en encastre der ensenhament, era joenessa, eth torisme, es servicis sociaus e d’autes matèries anàlogues de competéncia deth Conselh. Tanben se traspassen es mejans personaus damb foncions restacades ar immòble que se traspasse.
Era Generalitat de Catalonha se resèrve eth dret d’usatge, per part deth Departament d’Ensenhament, des installacions qu’aucupe er Institut d’Ostalaria de Les – Val d’Aran e en termini de dus mesi aurà de formalizar un convèni de collaboracion que se regularàn mejançant es drets e es obligacions d’ambdues parts.
Direccion e gestion der Archiu Generau d’Aran
Eth Conselh Generau d’Aran assumirà, a compdar der 1 d’abriu, era direccion e gestion der Archiu Generau d’Aran e se constituirà ua comission de seguiment que velharà pera coordinacion entre ambdues administracions en encastre des archius e era gestion documentau. Mejançant er acòrd aprovat ena session d’aué, era persona foncionària traspassada conservarà era condicion de foncionària dera Generalitat de Catalonha, ena situacion de servicis a d’autes administracions publiques, e se li aplicarà eth regim en vigor ena aministracion publica eth qué preste servicis.
En matèria de patrimòni hestiu, eth Conselh Generau d’Aran assumís era declaracion des hèstes populares d’Interès Culturau der encastre territoriau d’Aran e era catalogacion des hèstes, manifestacions e celebracions comunitàries, atau coma es elements hestius damb vigéncia en Aran.
Per çò que tanh ath comèrç e ara artesania, era Comission Bilaterau a acordat eth traspàs des següentes foncions: er impuls, er assessorament, era promocion e era organizacion de hèires e d’autes activitats entara promocion e era dinamizacion deth comèrç e era artesania d’Aran e des hèires especializades, laguens e dehòra d’Aran; er impuls ara formacion entara melhora deth comèrç e era artesania; e eth foment dera activiat comerciau e artesanau.
Infrastructura basica de proteccion civiu
Era situacion geografica deth territòri aranés, caracterizada per un entorn muntanhós e ua climatologia extrèma, compòrte uns risqui evidenti tant entàs bens e es comunicacions coma entàs persones. Aguest entorn a de besonh compdar damb ua infrastructura basica tecnica de proteccion civiu, er establiment qu’enguan ne serà assumida peth Conselh que tanben serà responsable d’elaborar es plans de proteccion civiu, era planificacion d’aguesta matèria e era prevencion des risqui en encastre territoriau d’Aran.
Era Generalitat de Catalonha e eth Conselh Generau d’Aran s’obliguen a collaborar ena metuda en comun d’informacion, avisi e previsions entara deteccion de risqui e era accion dera situacion d’emergéncia, atau coma era implantacion territoriau des Plans d’Emergéncia e d’Autoproteccion, simulacres e programes de formacion e difusion de proteccion civiu.
Pendent era reünion der Organ permanent de relacion entre es govèrns e es administracions dera Generalitat e d’Aran, tanben s’a adoptat eth Reglament d’Organizacion e foncionament dera Comission Bilaterau Govèrn dera Generalitat- Conselh Generau d’Aran.
Eth sindic d’Aran, Carlos Barrera, a manifestat “dat era situacion economica que patim ei fòrça dificil auançar coma ac estam hènt e poder aportar ara Val d’Aran projèctes de país coma aguest demòstre que trabalham e defenem es interèssi deth nòste país”