Vielha, 19 de junhsèga de 2018.- Es integrants dera Comission de Lengua deth Conselh des Illustres Collègis d’Avocats de Catalonha s’amassen deman diuendres 20 de junhsèga damb es representants der IEA-Academia aranesa dera lengua occitana.

Era amassada ena Val d’Aran aurà lòc ena sedença der IEA-AALO entàs 12 ores, e compdarà damb era preséncia de Joan Riera e Claret, president dera Comission de Lengua des Illustres Collègis d’Avocats de Catalonha, deth sindic d’Aran, Carlos Barrera, deth vicesindic d’Aran, Luís Carlos Medina e de Jusèp Loís Sans, president der Institut d’Estudis Aranesi, acompanhadi de representants d’ambdues institucions.

Pendent era reünion ena que se presentaràn es prètzhèts qu’amien a tèrme era Comission de Lengua des Collègis d’Avocats e er IEA, tanben s’abordarà era situacion der aranés en àmbit dera Administracion de Justícia, e s’estudiarà e se debaterà sus era senténcia deth TC 11/2018 de 8 de hereuèr de 2018 sus eth recors d’inconstitucionalitat 4.460-2011 interpausat per president deth Govèrn Espanhòu damb relacion a diuèrsi precèptes dera Lei deth Parlament de Catalonha 35/2010 de 1 d’octobre, der occitan, aranés en Aran.