Vielha, 18 de gèr de 2019.- Aué s’a celebrat era prumèra session der an dera Comission d’Urbanisme d’Aran, damb era particularitat qu’a estat ua session dera comission que per prumèr viatge s’an avalorat es expedients geridi pera Oficina Tecnica d’Urbanisme e es servicis tecnics e juridics deth Conselh Generau d’Aran en coordinacion damb es servicis tecnics d’urbanisme dera secretaria d’Abitat Urban e Territòri dera Generalitat de Catalonha. Aguest nau format arrespon ath desvolopament dera Lei 1/2015 deth regim especiau d’Aran que fixe eth nau foncionament dera Comission d’Urbanisme d’Aran.

Eth secretari d’Abitat Urban e Territòri dera Generalitat de Catalonha, Agustí Serra, a hèt mencion ara importància d’aguest nau modèl donques que supause ua evolucion e ua modernizacion ena gobernança en çò que tanh ath territòri d’Aran.

Pera sua part, eth sindic d’Aran, Carlos Barrera, a soslinhat qu’er hèt qu’es expedients dera Comission d’Urbanisme d’Aran agen estat informadi pes servicis tecnics e juridics deth Conselh Generau d’Aran ei fòrça important pr’amor que d’aguesta manèra se da compliment ath desvolopament dera Lei 1/2015 deth regim especiau d’Aran en un moment qu’era situacion politica en Catalonha, qu’encara ei complicada, a dificultat eth dret deth pòble aranés d’auançar en desvolopament dera pròpria Lei qu’ei estrategic entà assolidar ath Conselh Generau d’Aran coma govèrn territoriau deth país.

Era Comission d’Urbanisme d’Aran, a informat sus eth Plan Director Urbanistic de Campings, qu’abaste tota Catalonha damb er objectiu de regular era activitat d’aguestes installacions tant en çò que tanh as preexistentes coma as de naua planta, entà establir critèris d’ubicacion, païsatgistics, de mobilitat e de servici. Eth nau Plan Director qu’elabòre era secretaria d’Abitat Urban e Territòri somet era suspension de licéncies de quinsevolhe camping que sigue de naua planta pendent un an tant en Aran coma en rèste de Catalonha e en çò que tanh as campings preexistentes, aguesti non poderàn hèr ampliaments de mès deth 50% dera sua superficia, mentre s’elabòre eth nau Plan Director Urbanistic de Campings.

En aguest sentit, era Comission d’Urbanisme d’Aran a aprovat era modificacion des Nòrmes subsidiàries e complementàries de planejament dera Val d’Aran en contorn de Bossòst, entara admission d’activitat de camping en solèr non urbanizable o de proteccion especiau.

En cas de Les, era Comission d’Urbanisme d’Aran a aprovat era modificacion des Nòrmes subsidiàries de planejament en contorn dera plaça Conselh Generau d’aguesta poblacion en çò que tanh ara alineacion de dues edificacions preexistentes respecte ara vialitat; e avalorèc favorablaments era modificacion des Nòrmes subsidiàries e complementàries deth planejament en contorn ED3/UA4 ara demora que se melhoren ahèrs de tipe tecnic e juridic.