• Aguest prumèr informe favorable adaptarà era qualificacion deth solèr non urbanizable ara legislacion urbanistica e de planificacion territoriau actuau e permeterà ampliar es usatges admetudi en aguest tipe de solèr

Aguest matin a auut lòc ena sedença deth Conselh Generau d’Aran era Comission d’Urbanisme dera Val d’Aran, presidida pera sindica d’Aran, Maria Vergés, e eth secretari d’Agenda Urbana e Territòri, Agustí Serra. En aguesta amassada s’a emetut un prumèr informe favorable, laguens deth tramit ambientau, ara modificacion des Nòrmes Subsidiaries e Complementaries dera Val d’Aran en Bossòst.

Es Nòrmes dera Val d’Aran sigueren aprovades en 1982 e, en cas deth solèr non urbanizable, son fòrça restrictives enes usatges permetudi, en tot limitar-les basicament as bòrdes e cabanes agropecuàries de tipologia tradicionau, refugis de nauta montanha e bèth tipe d’equipament.

D’alavetz ençà, s’an aprovat diferenti esturments de planificacion territoriau e urbanistica que, entre d’auti, amplien es usatges d’aguest tipe de solèr, coma ei eth cas des campings e activitats recreatives tostemp que siguen compatibles damb es valors ambientaus e ecologics requeridi.

Actuaument eth solèr non urbanizable en municipi de Bossòst ei qualificat coma rustic, damb usatges preferiblement agropecuàris, e de proteccion especiau, a on sonque se pòden plaçar usatges compatibles damb era condicion naturau e era preservacion de bòrdes e cabanes.

A trauès eth canvi de Nòrmes, eth solèr non urbanizable se qualificarà coma de proteccion especiau (espacis PEIN, Xarxa Natura 2000) e de proteccion preventiva, possibilitant ua ampliacion des usatges permetudi.

Damb er informe emetut aué pera Comission d’Urbanisme dera Val d’Aran, s’inície era tramitacion ambientau dera modificacion des Nòrmes, que tanben a de superar era corresponent tramitacion urbanistica.