Vielha, 8 de mai de 2018.- Laguens des actes deth 15au anniversari deth parc d’òci familhau Sendaviva, s’a celebrat a Arguedas (Navarra), era jornada professionau “Era estacionalitat toristica en destinacions d’interior” en qué s’a aprigondit ena manèra de combàter aguesta problematica qu’afècte eth sector toristic, en tot cercar pautes e solucions entà palliar-la.
Era jornada inaugurada peth vice-president deth Govèrn de Navarra, Manu Ayerdi, comencèc damb ua conferéncia der expèrt era planificacion e desvolopament de destinacions toristiques Richard Butler, guanhador en 2015 deth 12au Prèmi Ulisses autrejat pera Organizacion Mondiau de Torisme (OMT), qu’a mercat es pautes entà lutar contra era estacionalitat. Er autor dera teoria “Eth cicle de vida des destinacions toristiques” (1980), ua des òbres mès influentes en camp deth torisme, soslinhèc pendent era sua intervencion qu’era estacionalitat ei un desequilibri entre era aufèrta e era demanda, maugrat que remerquèc que i a formules entà redusir-la. Era idèa ei aumentar era demanda enes epòques baishes, o a viatges redusir era aufèrta, didec, en tot ahíger qu’era major influéncia entara estacionalitat l’exercissen es vacances escolares.
Dempús dera ponéncia de Richard Butler, se desvolopèc ua taula redona entà aprigondir sus eth problèma dera estacionalitat toristica enes destinacions d’interior.
Pendent era madeisha, era conselhèra de Torisme e Desvolopament Economic d’Aran, Anna Díaz, expliquèc coma se gerís aguest fenomèn ena Val d’Aran, en tot afirmar que Aran compde damb ua ampla capacitat otelèra e de lotjaments, qu’enes moments de sason nauta supause quate còps era poblacion e en tot assegurar que, es ostalèrs dera Val d’Aran son pleaments adaptadi ara estacionalitat.
Era taula redona tanben compdèc damb era participacion de Maitena Ezkutari, directora generau de Torisme e Comèrç deth Govèrn de Navarra; Rubén González, gerent de Sendaviva; e Javier Blanco, assessor toristic e president de Tourism & Innovation. Eth moderador dera taula redona siguec Francisco Javier Castillo, CEO a DNA Expertus Torisme e Òci.
Sendaviva, qu’albergue mès de 800 animaus de 200 espècies diferentes, s’a convertit enes sòns 15 ans d’istòria en uns des principaus motors economics dera zòna dera Ribèra. Es mès de 2.100.000 de visitants qu’a arrecebut eth parc en aguest periòde an supausat un important impacte dirècte ena economia non sonque en airau d’influéncia deth parc, tanben ena rèsta dera Comunitat Forau de Navarra.
