Era aucupacion otelèra mieja siguec deth 46% e s’arribèc ath milion de pernoctacions
Vielha, 22 de març de 2019.- Era conselhèra de Torisme, e Desvolopament Economic d’Aran, Anna Díaz, presentèc as sòcis de Foment Torisme Val d’Aran es resultats des activitats amiades a tèrme pera entitat pendent eth 2018 laguens era 3au Net deth Torisme dera Val d’Aran. Er acte auec lòc en Otèl Aran La Abuela de Vielha, establiment associat a Torisme Val d’Aran.
Era conselhèra de Torisme d’Aran hec ua avaloracion fòrça positiva des resultats e des accions amiades a tèrme peth departament de promocion toristica deth Conselh Generau d’Aran, en tot destacar que s’a incrementat era aufèrta toristica ena Val d’Aran, que s’an legalizat naui lotjaments toristics e que s’an daurit naui establiments tant de restauracion coma comerciaus, en tot méter en valor qu’empresaris d’Aran daurisquen es pòrtes de naui establiments. Anna Díaz, soslinhèc qu’era aufèrta toristica der Aran ei de fòrça qualitat.
En çò que tanh as chifres, era conselhèra de Torisme expliquèc qu’era aucupacion mieja ena Val d’Aran pendent tot er an siguec de 46% des places otelères deth territòri, damb un increment deth nombre de visitants estrangèrs que se placèc en 26%. Es toristes estrangèrs procedissen majoritàriaments de França, seguit d’Israèl, Gran Bretanha, e es païsi deth nòrd d’Euròpa. En çò que tanh as visitants nacionaus, se manten era procedéncia majoritària de Catalonha, seguit de Levante, Madrid, País Basc e Andalosia.
Foment Torisme Val D’Aran, gestione es burèus de torisme de Vielha e Salardú pendent tot er an, e eth d’Arties en estiu, amassa damb es punts d’informacion d’Aran Park, Aiguamòg e Artiga de Lin. Torisme Val d’Aran tanben gestione amassa damb Baqueira Beret, eth burèu de torisme de Tolosa.
En çò que tanh as accions desvolopades per Torisme Val d’Aran en 2018, Anna Díaz, expliquèc que se contunhe en tot trabalhar ena consolidacion dera imatge dera destinacion toristica Val d’Aran, a trauès des certificacions qu’apòrten diuèrsi valors de mèrca. En aguest aspècte, Foment Torisme Val d’Aran compde damb era certificacion Biosphere, Smart Destination, e eth sagèth de destinacion de torisme familhau.
Pendent era Net deth Torisme dera Val d’Aran, eth director executiu dera Agéncia Catalana de Torisme, Patrick Torrent, presentèc es èishi basics deth Plan de marqueting dera Agéncia Catalana entàs pròplèus tres ans. En çò que tanh ara Val d’Aran, Torrent, destaquèc qu’es accions que mès beneficien era activitat toristica son es quaus van encaminadas a desvolopar producte desestacionalizat, desconcentrat, diversificat e qu’apòrte major despensa, donques qu’era Val d’Aran ei un territòri damb ua nauta diuersitat de recorsi toristics. Torrent expliquèc tanben qu’era Val d’Aran s’includirà en “Gran Tour de Catalonha” entà mostrar çò qu’ei Catalonha de forma transversau.
Memòria Torisme Val d’Aran 2018: https://www.conselharan.org/wp-content/uploads/2019/03/memoria-2018-ARANES.pdf