Vielha e Mijaran artenh ua aucupacion de 65% en pònt

220 persones visiten eth centre d’Interpretacion dera Artiga de Lin

Vielha, 10 de deseme de 2018.- Era conselhèra de Torisme d’Aran, Anna Díaz, a hèt ua avaloracion positiva des resultats dera aucupacion toristica e dera activitat pendent eth pònt dera Puríssima ena Val d’Aran, maugrat qu’era fauta de nhèu pendent aguesti dies a hèt qu’es resultats non agen estat tan positius coma es un der an darrèr.

En aguest sentit, Anna Díaz, manifestèc eth sòn arregraïment ara estación de Baqueira Beret per esfòrç extraordinari des responsables dera estacion, e sustot des equipes de montanha, que trabalhèren intensaments maugrat es condicions meteorologiques e heren qu’era estacion barrèsse eth pònt damb 40 km de pistes dubèrtes quan ac auien començat damb sonque 15 km e damb 20.000 esquiaires enes pistes des deth dijaus enquiath dimenge.

Anna Díaz expliquèc qu’era aucupacion toristica en Naut Aran a estat de 40%, e en Vielha e Mijaran era aucupacion mieja de toti es dies deth pònt a estat d’entre eth 60% e eth 65%. Díaz a destacat tanben eth gran ambient en Baish Aran ath torn des activitats organizades. Atau, era conselhèra a destacat qu’es activitats organizades pes ajuntaments e eth Conselh Generau d’Aran, a trauès deth departament de Cultura e Auviatge e deth Musèu dera Val d’Aran, an hèt qu’es visitants agen pogut gaudir dera grana aufèrta qu’en aguest sens aufrís Aran.

Díaz, a destacat es 220 visitants qu’a acuelhut eth centre d’Interpretacion dera Artiga de Lin pendent aguesti dies e es mès de 300 consultes qu’a atengut eth Burèu de Torisme de Vielha.

Era conselhèra de Torisme tanben hèc referéncia ara bona aucupacion des visitants de dusau residéncia qu’a hèt qu’es comèrci e eth sector dera restauracion dera Val d’Aran agen obtengut boni resultats pendent eth pònt.

Fotos: Baqueira Beret/Visit Arties