• 25 artesans e productors agroalimentaris de diferenti sectors participen ena hèira damb era venta de productes dera Val d’Aran.
• Pendent es diferentes jornades auràn talhèrs e se realizarà ua tòia d’ua cistalha damb productes artesanaus.
Era conselhèra de Torisme e Desvolopament Economic d’Aran, Anna Díaz, acompanhada peth baile de Vielha e Mijaran, Juan Antonio Serrano, a inaugurat era hèira Hèt a man, hèt aciu, qu’organize eth Conselh Generau d’Aran, e qu’aurà lòc en Vielha (Passèg dera Libertat) es dies 16, 17 e 18 d’agost de 10:30 a 14:30 ores e de 16:30 a 21:00 ores. Se tracte d’ua hèira qu’enguan arribe ara sua VIIau edicion e qu’a coma objectiu promòir as artesans e es productes dera Val d’Aran.
Aguesta hèira s’organize damb era collaboracion dera Deputacion de Lleida, Ajuntament de Vielha e Mijaran, Associacion d’Artesans e Artistes dera Val d’Aran, productors dera marca de garantia “Productes dera Val d’Aran” e dera Associacion de Cases de Pagés ena Val d’Aran.
Enguan era hèira compde damb un totau de 25 artesans e productors agroalimentaris de diferenti sectors: paèrs, veire, ceramica, bijuteria, sabons, texil, rebosteria e begudes entre d’auti. Ua grana representacion dera produccion artesanau que s’elabòre ena Val d’Aran.
“Damb aguesta hèira volem dar a conéisher, tant as aranesi coma ara gent que mos visite en ostiu, es diferenti sectors artesanaus dera man des sòns productors que representen ua activitat importanta laguens deth comèrç locau” a manifestat era conselhèra de Torisme e Desvolopament Economic d’Aran, Anna Díaz.
Pendent es 3 dies, es visitants ara hèira poderàn apropar-se as estands entà crompar es productes. Ath delà, pes tardes, poderàn gaudir de diferenti talhèrs e demostracions a cargue des madeishi artesans.
Ara fin dera hèira, eth dimenge 18 d’agost, entàs 20:00 ores, se realizarà era tòia d’ua cistalha complèta damb productes de toti es artesans que participen e que includís tanben ua dimenjada en ua des cases de pagès dera Val d’Aran.
TALHÈRS DE “HÈT A MAN, HÈT ACIU”
• De 17:30 a 19:00 ores:
Dimars, 16 d’agost:
– Elabòra era tua pasta de dents, a cargue deth Jardin des hades.
– Demostracion d’elabòracion d’ua cabana damb fibres vegetaus, a cargue de Paèrs Bausen.
– Hèm ua tarjeta suspresa!, a cargue d’Alicia Mitjans.
Dimèrcles, 17 d’agost:
– Decòra e pinta era tua caisheta, a cargue d’Olga Zubatii.
– Talhèr de bombes e saus de banh, a cargue de Sabons Careça.
– Talhèr de parpalhòles, a cargue de Berd e Blu.
Dijaus, 18 d’agost:
– Telar artistic, a cargue deth Talhèr textil de Bausen.
– Talhèr de clauèrs e bracelets de macramè, a cargue de Baobab artesania.
Vielha, 16 d’agost de 2016
Conselh Generau d’Aran: Núria Sanjuan