Eth sindic d’Aran Carlos Barrèra, a acompanhat ara conselhèra de Governacion e Relacions Institucionaus dera Generalitat de Catalonha Meritxell Borràs ara amassada qu’a mantengut damb es responsables deth IEA – Academia Aranesa dera Lengua Occitana pendent era sua visita ena Val d’Aran

Eth president der Institut d’Estudis Aranesi – Academia Aranesa dera Lengua Occitana Jusèp Loís Sans, expliquèc que Catalonha a 12 academies que 11 n’an era sua sedença en Barcelona e sonque ua, era Academia Aranesa dera Lengua Occitana, a era sua sedença ena Val d’Aran, en tot èster era unica estructura qu’a autoritat sus era lengua Occitana en tot eth mon. Çò que mos aumplís d’illusion mès tanben represente ua grana responsabilitat, ahigec.

Sans a metut en coneishença dera conselhèra es prumèrs trabalhs qu’a amiat a tèrme era Academia, coma son era edicion des discorsi des membres dera Academia prononciada eth dia der acte inaugurau, era prumèra Nòrma Ortografica sus er Occitan estandard, e era edicion dera prumèra Gramatica Basica d’Occitan -Aranés.

Pera sua part era consellera de Governacion Meritxell Borràs, s’a comprometut a presentar as responsables dera Escòla d’Administracion Publica de Catalonha eth prètzhèt qu’amie a tèrme era Academia Aranesa dera Lengua Occitana, entà meter-la a disposicion des trabalhadors dera foncion publica catalana, donques que didec, auem de contunhar en tot esforçar-mos pera coneishença der aranés que, arrebrembèc, ei lengua oficiau en Catalonha.

Eth sindic d’Aran Carlos Barrera, a volut arregraïr ara conselhèra coma representanta deth Govèrn dera Generalitat e eth Parlament de Catalonha, era collaboracion qu’an arrecebut es institucions araneses e de manèra especiau eth Conselh Generau d’Aran entà hèr çò qu’a definit que se prepausèc coma un sòn impossible, e qu’aué ja ei tota ua realitat. Barrera a definit eth IEA- Academia Aranesa dera Lengua Occitana coma er unic estrument que pòt acuélher era reconeishença dera lengua aranesa.