Vielha, 1 de junh de 2018.- Eth Plen dera Deputacion de Lhèida a aprovat mejançant un convèni de collaboracion damb eth Conselh Generau d’Aran, era aportacion de 329.000 èuros entath finançament deth programa de Melhora dera accessibilitat es espacis naturaus qu’eth Conselh Generau d’Aran desvolòpe damb hons provenenti des projèctes FEDER 2014-2020 d’accions destinades ara conservacion d’accèssi ar auviatge naturau e culturau de gran valor païsatgistic, patrimoniau e istoric dera Val d’Aran.
?????????????
En aguest periòde eth Conselh Generau d’Aran destine 1.592.000 € ara conservacion d’accèssi ar auviatge naturau e culturau dera Val d’Aran, que 657.000€ ne son provenenti der èish prioritari 6 deth hons FEDER 2014 a 2020, entara ponuda en valor der auviatge naturau e culturau que permete era sostenibilitat de destinacions toristiques en territòri, qu’ara se li ahig eth finançament dera Deputacion de Lhèida.
Eth projècte deth Conselh Generau d’Aran, englobe toti es municipis dera Val d’Aran e presente un conjunt d’intervencions e òbres importantes entà apariar e recuperar tot un conjunt de vies d’accès ath miei naturau dera Val d’Aran, mejançant diuèrses accions de melhores e òbres d’accèssi enes airaus naturaus destacables d’Aran, entà hèr-les visitables e accessibles toristicament, en tot prestar especiau atencion tanben as besonhs des persones damb mobilitat redusida.
En aguest sens, eth sindic d’Aran, Carlos Barrera, a manifestat que “eth miei naturau, ei un recors toristic de prumèr orde entara Val d’Aran pendent fòrça mesi der an, e aguest projècte s’enquadre ena linha de trabalh deth Conselh Generau d’Aran, quina des dera sua restitucion en 1990, e es posteriors traspassi de competéncies en torisme e miei naturau dera Generalitat de Catalonha, a amiat a tèrme entà hèr visitables aguesti espacis e protegir-les”.
Er apàrii des pistes forestaus tanben facilitarà er accès as refugis de nauta montanha coma eth de Restanca, Colomers, Saboredo, o es dera Artiga de Lin e Aneto pera ribèra dera Artiga e er itinerari d’accès ath Montlude.
Eth president dera Deputacion de Lhèida, Joan Reñé, a explicat que “era Deputacion dar supòrt ath Conselh Generau d’Aran ena presentacion dera sollicitud de subvencion ara convocatòria FEDER, ath considerar eth sòn interès estrategic entara Val d’Aran, pr’amor qu’era finalitat d’aguest finançament ei satisfèr objectius e besonhs locaus que contribuïsquen ara realizacion dera estrategia 2020 dera Union Europèa entà un creishement sostenible, intelligent e integrador”.
