• Era Val d’Aran a acuelhut era presentacion deth Mercat Sectoriau deth Comèrç entara crompa-venta de petiti negòcis en aguest sector, damb era participacion dera Confederacion de Comèrç de Catalonha.

• Dempús dera sua metuda en marcha, eth Centre de Reempresa de Catalonha a intermediat ena crompa-venta de mès de 450 empreses qu’an supausat era mantenença d’apròp de 1.700 lòcs de trabalh.

• Eth 35,25 % des Reempreses d’èxit corresponen ath sector deth comèrç, hèt qu’a propiciat era creacion d’un mercat de crompa-venta pròpia entath sector deth comèrç.

Eth Conselh Generau d’Aran a acuelhut era presentacion deth Reempresa – Mercat Sectoriau deth Comèrç, que met en contacte empresaris deth sector deth comèrç que vòlen véner eth sòn negòci damb persones emprenedores dispausades a crompar-lo.

Era presentacion a compdat damb era participacion deth sindic d’Aran, Carlos Barrera, deth director generau de Comèrç dera Generalitat de Catalonha, Josep Mª Recasens, dera conselhèra de Torisme e Desvolopament Economic d’Aran, Anna Díaz, deth president dera patronau Cecot e deth Centre de Reempresa de Catalonha, Antoni Abad, dera delegada dera Confederacion de Comèrç de Catalonha en Lhèida, Mª Rosa Armengol, e deth director deth Centre de Reempresa de Catalonha, Albert Colomer.

Pendent era presentacion s’a hèt enfasi ena importància d’auer mecanismes que permeten sauvaguardar es destinacions comerciaus pera implicacion dirècta en entorn de pòbles e ciutats. “Sajar de mantier un teishum contunhat enes locaus e espacis comerciaus, en tot hèr possible eth traspàs o era cession a un nau reemprenedor ei important entà evitar eth barrament d’empreses mès tanben per impacte dirècte sus ua zòna o territòri” a manifestat era conselhèra, Anna Díaz.

Aguest ei eth prumèr Mercat Sectoriau qu’eth Centre de Reempresa de Catalonha a metut en marcha, frut deth convèni qu’era patronau Cecot signèc er an passat damb eth Departament d’Empresa e Aucupacion dera Generalitat de Catalonha entà dar impuls ara implantacion sectoriau deth pròpi Centre e per tau d’estructurar eth mercat dera crompa-venda de petites e mejanes empreses en Catalonha. Se preten, atau, unificar era politica ena matèria de transmission d’empreses, d’acòrd damb es directritzes der Entrepreneurship 2020.

“Era implantacion sectoriau deth Centre Reempresa de Catalonha aufrís ua oportunitat a toti aqueri titulars d’ua activitat empresariau que non pòden dar-li contunhitat, es persones cedents, damb totes aqueres persones reemprenedores que gaudiràn des avantatges de préner eth relèu d’ua activitat empresariau existenta e assolidada, en lòc de crear ua naua empresa”, a remercat Abad.

A finaus deth 2014, era Confederacion de Comèrç de Catalonha e era Cecot signèren un acòrd de collaboracion que permeterà forçar e impulsar era consolidacion d’un mercat estructurat de crompa-venta de negòcis petiti en encastre deth comèrç.

Donades dera gestion de Reempresa – sector comèrç

A compdar dera metuda en marcha deth servici, Reempresa a artenhut un totau de 459 reempreses d’èxit, damb ua inversion indusida de 22.000.000 € e era mantenença de 1.683 lòcs de trabalh. D’aguestes, 35,25%, apartien ath sector comèrç.

Eth pes deth sector comèrç per çò qu’ei deth totau des empreses cedents e des reemprenedors, ei de 36% e 22,3% respectivaments.

Deth totau dera inversion indusida, eth 32,33% requè en eth sector deth comèrç, en tot acumular mès de 6.466.000€. Eth prètz miei d’un comèrç se place entorn as 45.000€.

Deth conjunt d’operacions intervengudes, eth prètz de cession mès baish a estat de 1.600€, ath temps qu’eth mès naut a arribat ath milion d’èuros.

Reempresa en Lhèida

Dempús dera metuda en marcha deth servici enquia junh de 2015 s’an produsit 26 reempreses d’èxit. Aguestes empreses an generat ua inversion indusida de 592.560€. D’aguestes, 38% des reempreses d’èxit son deth sector servicis, 31% deth sector comèrç e 23% deth sector ostalèr. Per çò qu’ei dera inversion indusida, un 59% correspon ath sector servicis, un 26% ath sector comèrç e un 10% ath sector ostalèr.

Es motius de cession d’aguestes empreses son diuèrsi. En tèrmes relatius, eth 36% des empreses cerquen relèu per jubilacion deth proprietari/a, eth 14% per cambi de profession, eth 12% per cambi d’abitança e eth 11% per problèmes de salut, entre d’auti.

Ena província de Lhèida s’an atengut a un totau de 130 reemprenedors, 40% que s’interèssen peth sector servicis, 23% peth sector comèrç, 7% pera indústria.

Collaboracion Reempresa-CaixaBank

CaixaBank, comprometuda damb eth supòrt as emprenedors, da supòrt a Reempresa damb assessorament personalizat e productes a mesura a trauès deth programa Caixa Negocis, adreçat a microempreses, comèrci e autonòms.

Era entitat aufrís as emprenedors proximitat e innovacion, damb ua equipa de gestors especializadi en segment emprenedor que se desplacen ath lòc de trabalh deth client e pòden hèr des d’aquiu eth prètzhèt d’assessoria e contractacion de productes gràcies a estruments tecnologics auançadi.

Atau madeish, CaixaBank aufrís naues solucions de productes e servicis as emprenedors. Entre d’auti avantatges, dispòse d’ua linha de credit de 175 milions entà finançar tant es operacions d’aqueriment e traspàs coma era metuda en marcha dera naua etapa des empreses.

Actuauments, CaixaBank ei era entitat cap en segment de professionaus e autonòms, damb mès de 1,4 milions de clients e ua penetracion de 31,35%.