• Aguesta pionèra empresa especializada en vòls de drons en montanha aufrís servicis en ua amplia varietat d’airaus qu’includissen era ramaderia, era seguretat, es inspeccions tecniques o es emergéncies, entre d’auti

• Era sua incorporacion en HUB d’innovacion HèPic e eth sòn plaçament en CEI de Casau, permeterà crear sinergies damb d’autes empreses emergents e emprenedors des zònes ruraus de montanha, en tot daurir naues oportunitats entà Aran

Eth Centre d’Empreses Innovadores (CEI) deth Conselh Generau d’Aran compde damb ua naua empresa ena sua sedença en Casau: Pirineos Drone Aviation, ua empresa pionèra laguens deth sòn airau e que dejà forme part tanben de HèPic, eth HUB d’innovacion rurau en zònes de montanha.

Aguesta pionèra empresa ei especializada en vòls de drons en montanha, en tot èster era unica empresa especializada en aguest airau de tot er Estat. Pirineos Drone Aviation aufrís servicis de contròl de bestiar en zònes pòc accessibles (recompde, identificacion d’animaus herits e/o recèrca d’animaus perdudi), captacion d’imatges aerianes tà realizar inspeccions tecniques damb era finalitat de detectar besonhs en manteniment o mancançes de seguretat, en tot obtier donades a temps reau, e comparables ath long deth temps, supòrt tecnic en emergéncies e en rescats de montanha, realizacion de materiau audiovisuau e cinematografic, seguiment d’eveniments e seguretat e reportatges de construccion tà immobiliàries e oficines d’òbres publiques, entre d’auti.

Pendent era sua visita as installacions dera empresa, eth vicesindic d’Aran, Juan Antonio Serrano, destaquèc er enòrme valor qu’a aguesta iniciatiua entath conjunt deth territòri: “era creacion d’empreses tecnologiques coma Pirineos Drone Aviation ajuden ara Val d’Aran a reactivar e diversificar es activitats economiques des nòsti pòbles, en tot auançar entà un nau modèu economic basat ena innovacion e era retencion deth talent des nòsti joeni”.

Entath conselhèr d’Innovacion e Naues Tecnologies, Francés Boya, “era incorporacion d’aguesta empresa a HèPic e eth sòn plaçament laguens deth CEI ei ua fòrça bona notícia entara Val d’Aran, pr’amor que des deth govèrn deth Conselh Generau èm fòrça segurs qu’er hèt d’èster en contacte estret damb d’autes empreses emergents e eth supòrt que les aufrirà eth HUB d’innovacion rurau, poirà dar lòc a sinergies fòrça interessantes entre diuèrsi mercats e demoram que genère naues oportunitats damb es qu’Aran en sòn conjunt se pogue veir beneficiada”.

Es creadors de Pirineos Drone Aviation an impulsat tanben eth projècte Kids&Drones, qu’a coma objectiu era divulgacion culturau, scientifica, tecnologica e dera istòria aeronautica ara mainadèra e as persones interessades ena tematica. Ath delà, son en procès d’aquerir un dron de caracteristiques fòrça tecniques damb eth que compden molt pògues empreses en tota España, damb era finalitat d’apropar era tecnologia mès puntèra ara Val d’Aran e meter-la ath servici des empreses deth territòri.