Aguesta setmana s’an aprovat e publicat es listes d’equipes continentaus UCI (Union Ciclista Internacionau), qu’includissen era naua equipa MASSI- KUWAIT CYCLING PROJECT, equipa que concorrerà en eth er aranés Ruben Caseny.

Eth Conselh Generau d’Aran, er Ajuntament de Naut Aran e Torisme Val d’Aran, contunhen d’apiejar e en tot fomentar er espòrt d’elèit. Es institucions araneses ath costat dera mèrca catalana de biciclètes MASSI, an estat pèça clau ena creacion d’aguesta equipa, per auer aconselhat e apiejat ara Federacion de Ciclisme de Kuwait en impuls d’aguest nau projècte.

Era equipa aurà era sua sedença en Kuwait, país que vò invertir e apostar peth ciclisme damb un projècte a long termini e compdarà damb un dusau blòc ena Val d’Aran que garantisque era incorporacion ath ciclisme professionau de corredors aranesi, ilerdencs e catalans. Aguesta equipa que ja concorrec en aguesta madeisha categoria est an passat, se renauís e refortilhe damb naui patrocinadors e corredors europèus qu’aportaràn era sua valiosa experiéncia. Eth blòc europèu dera equipa serà integrat per Aranés Ruben Caseny, er ilerdenc Marc Vilanova, er alicantin Axel Costa e er alemand Andreas Keuser, ath delà de de auti ciclistes europèus que s’incorporaràn ath madeish enes pròplèus dies e que concorreràn principauments en carrères ena peninsula iberica e en Euròpa Occidentau. Eth blòc damb sedença en Kuwait afrontarà es competicions deth Golf Pérsico, Asia e Euròpa der Èst.