Era Escòla de Tecnics Esportius Val d’Aran (ETEVA) autregèc es diplòmes corresponents ara formacion des corsi subvencionadi entà persones en caumatge, a on participèren mès de 60 persones dera Val d’Aran e dera Alta Ribagorça.

Es escolans realizèren formacion en bèra ua des quate especialitats des certificadi de professionalitat que s’aufrien:

– Atencion sociosanitaria a persones en domicili.
– Promocion toristica locau e informacion ath visitant.
– Dinamizacion d’activitats en léser educatiu.
– Socorrisme en installacions aquatiques.

Eth certificat de professionalitat ei un document oficiau qu’acredite a qui l’artenh qu’ei competent professionaument entà desvolopar ua activitat laborau d’acòrd damb es exigéncies dera produccion e era aucupacion. Ei a díder, qu’a es coneishences e abiletats entà desvolopar-la, de forma corrècta e d’acòrd damb es exigéncies deth mercat.

Es corsi, organizadi pera ETEVA (escòla restacada ath Conselh Generau d’Aran), sigueren subvencionadi peth Hons Europèu, eth Ministerio de Trabajo e eth Servei d’Ocupació de Catalonha.

En acte se destaquèc era capacitat d’esfòrç des persones que participèren enes corsi, e era satisfaccion pera obtencion des objectius, dat que bèra d’eres an artenhut inserir-se en sector laborau en que se formèren, e crear naues iniciatiues empresariaus en territòri.