A començaments deth mes d’abriu, era Escòla Garona de Vielha acuelhec es talhèrs de “Trabalham es Valors”, organizadi per Càritas d’Urgell, damb sedença ena Val d’Aran. Eth tèma escuelhut pera Escòla siguec eth Medi Ambient. Arraïtz dera charrada explicativa, es mainatges e mainades vederen imatges de com afècte eth nòste comportament vèrs eth medi ambient e heren ua experiéncia entà préner consciéncia de tot çò qu’aué en dia emplegam es envasi e plastics, soent sense encuedar-mos. Es talhèrs s’impartiren a totes es classes de primària.
Er objectiu deth talhèr de “Trabalham es Valors” sus eth Medi Ambient, coma ditz era Carta EncIclica Laudato Si deth Pair Francesc sus eth suenh dera casa de toti, ei eth següent:
“Sonque a compdar deth coitiu de solides vertuts ei possibla era donacion d’un compromís ecologic. Se ua persona, encara qu’era pròpria economia li permete consumir e gastar mès, abituauments s’abrigue un shinhau en lòc d’alugar eth cauhatge, açò supause qu’a incorporat conviccions e sentiments favorables ath suenh der ambient. Ei fòrça nòble assumir eth déuer de susvelhar dera creacion damb petites accions quotidianes, e ei meravelhós qu’era educacion sigue capabla de motivar-les enquia conformar un estil de vida. Era educacion ena responsabilitat ambientau pòt encoratjar diuèrsi comportaments qu’an ua incidéncia dirècta e important en ambient, coma evitar er usatge de materiau plastic e de papèr, redusir eth consum d’aigua, separar es residus, codinar sonque çò que raonablement se poderà minjar, tractar damb suenh as auti èssers viui, utilizar eth transpòrt public o compartir un madeish veïcul entre diuèrses persones, plantar arbes, amortar es lums innecessaries. Tot açò ei part d’ua generosa e digna creativitat, que mòstre era melhor part des persones. Eth hèt de reutilizar quauquarren en lòc de lançà’c rapidaments, a compdar de prigondes motivacions, pòt èster un acte d’amor qu’exprimisque era nòsta pròpria dignitat”.
Vielha, 19 d’abriu de 2017
Conselh Generau d’Aran: Núria Sanjuan
Hònt e fotos: Càritas d’Urgell, damb sedença ena Val d’Aran