Vielha, 21 de junhsèga de 2016.- Era 9au etapa deth Tour de França eth passat 10 de junhsèga ena Val d’Aran, a generat un impacte economic de 1’6 milions d’èuros, segontes er estudi d’impacte economic encargat peth Conselh Generau d’Aran.

Eth còst dera organizacion dera etapa deth Tour siguec de 80.000 èuros, que li cau ahíger d’auti 50.000 èuros corresponents ath servici de seguretat e activitats de promocion que hec eth Conselh Generau d’Aran es setmanes prealables ara etapa. Er impacte economic dirècte a multiplicat per 12 eth còst dera inversion hèta entà acuélher era gessuda dera etapa deth Tour.

Era conselhèra de Torisme e Desvolopament Economic deth Govèrn d’Aran, Anna Díaz, afirmèc que “eth esfòrç dera inversion hèta a valgut reauments era pena”. Díaz, destaquèc que der estudi se despren que “era despensa en lotjaments pendent era dimenjada deth Tour ena Val d’Aran, siguec d’uns 415.000 èuros, mentre qu’en gastronomia e comèrci s’elevèc a 1.175.000 èuros. Pendent es dies prealables e posteriors ara celebracion dera etapa es places otelères dubèrtes sigueren eth 83%, quan est an passat enes madeishes dates sigueren d’un 52%. Era aucupacion enes otèls artenhec eth 95,5%, es campings un 34%, en cases ruraus un 54%. En estudi non s’a comptabilizat er impacte dera dusau residéncia que tanben ei fòrça importanta en tota era Val d’Aran “.

En çò que tanh ar impacte mediatic, era avaloracion de retorn a nivèu informatiu de véner era marca toristica Val d’Aran en premsa escrita s’estime en 2,3 milions d’èuros e a nivèu de television, damb 21,6 milions d’espectadors, en uns 3,7 milions d’èuros.

Era 9au etapa deth Tour de França, tanben a servit entà qu’era Val d’Aran aumente era sua reputacion online, damb mès activitat a trauès d’internet e enes hilats sociaus. Un exemple ei era pagina web corporativa deth Conselh Generau d’Aran e era de Foment Torisme Val d’Aran, qu’a incrementat aguesti dies deth pas deth Tour e posteriors en un 76,2% eth nombre de visites.

Finalament, Anna Díaz, a arrebrembat que non solaments siguec acuélher era gessuda dera etapa, darrèr i auec fòrça trabalh prealable coma era inauguracion en Eth Portilhon deth monolit en aumenatge as 7 campions espanhòus deth Tour de França, que se hec en mes de mai, e es presentacions dera gessuda dera etapa en Toulouse e Barcelona, ath delà dera pedalada populara que s’organizèc enes dates anteriors ath pas dera carrèra francesa.