• Era artista, Ana Álvarez Ribalaygua, expause ena glèisa de Sant Joan d’Arties “Era Val enlumenada” ua seria d’installaciones vintage e fotografies

Eth vicesindic d’Aran, Luís Carlos Medina, amassa damb eth cap de Cultura, Patrimòni e Politica Lingüistica d’Aran, Jèp de Montoya, e damb eth baile d’Arties, David Torres, an inaugurat era exposicion “Era Val enlumenada” d’Ana Álvarez Ribalaygua, que se poderà visitar enquiath 4 d’abriu ena glèisa de Sant Joan d’Arties, damb orari de deluns a dissabte, de 17h00 a 20h00.

Ana Álvarez Ribalaygua, artista neishuda en Santander, demore en Arties ja hè tres ans.

Ei ua artista multimèdia d’activa trajectòria artistica ; a participat en simposiums, atau coma en “artist in residency” en Espanha, EEUU, Japon, Brasil e Nepal. Era sua darrèra mòstra, er an passat, la portèc tath Musèu de Patan en Katmandu.

Aguesta exposicion, damb eth títol “Era Val enlumenada” se compause d’ua seria d’installaciones vintage, e fotografies intervengudes a on i a introdusit tecniques de collage e lums leds.

Ath madeish temps rebrembe era celebracion, aguest an 2015 ena Val, deth 50 aniversari dera estacion d’esquí de Baqueira Beret. Era fotografia ei era desencusa, partint d’era coma se siguesse ua tela a on cosent damb lums, hièstra a hièstra, va creant ua atmosfèra onirica, mentre s’aluguen es lums dera Val quan se hè de net.

Eth cap de Cultura, Patrimòni e Politica Lingüistica d’Aran, Jèp de Montoya, a manifestat “ei un luxe auer aguesta exposicion d’Ana Álvarez en 50 aniversari dera estacion d’esquí Baqueira Beret, pera singularitat e categoria dera òbra dejà reconeishuda autant en Espanha, EEUU, Japon, Brasil e Nepal. Era major part dera òbra pren coma motiu era nòsta Val d’Aran”.