Vielha, 14 de març de 2018.- Era estacion d’esquí de Baqueira Beret damb era collaboracion deth Conselh Generau d’Aran e er Ajuntament de Naut Aran organize pendent tres dies, deth 16 ath 18 de març, es finaus dera OPA Cup FIS (tanben coneishudes coma Alpen Cup).

Er elèit europèu der esquí de hons se darà cita enguan ena Val d’Aran damb era participacion de mès de 150 corredors.

Era equipa espanhòla participe damb es melhors esquiaires de hons damb er objectiu d’arténher boni resultats en aguesta carrèra. Imanol Rojo, integrant dera equipa d’esquí de hons dera Reau Federacion Espanhòla Espòrts d’Iuèrn (RFEDI), que ven de participar enes JJ.OO de Pyeongchang 2018, ja artenhut diuèrsi top 15 ena OPA Cup d’autes sasons. Tanben concorreràn era esquiaira de hons aranesa Lydia Iglesias, ath delà de Martí Vigo, que tanben concorrec en Pyeongchang 2018, en tot èster part dera equipa RFEDI, atau coma es corredors deth Grop de Seguiment dera RFEDI e de Centres de Tecnificacion (CETDI).

Eth prumèr dia començarà damb un Sprint d’1 km damb distàncies d’entre 1,4 e 1,6 km segontes es categories. Eth dia 17 seguirà damb ua gessuda en massa (MassStart) ena competicion de Distància, a on es categories superiores concorreràn en 15 km es òmes e 10 km es hemnes, e en juniòr seràn 10 km entàs òmes e 5 km entàs hemnes.

Era estacion d’esquí aranesa demore ua participacion ath torn de 150 e 160 esquiaires, que se li an de somar es equipes tecniques, skiman e d’auti servicis.

Eth dia 18 se disputarà era darrèra competicion en persecucion (Pursuit), modalitat qu’es gessudes des competidors se placen segontes eth sòn temps. Eth guanhador deth sprint ges prumèr, eth dusau seguís ath de deuant, e atau successivaments. En aguesta carrèra guanhe er esquiaire que crotze abans era linha de mèta. Es punts valen eth doble, eth vencedor d’aguesta pròva guanharà eth trofèu OPA Cup 2018.

Eth conselhèr d’Espòrts e vicesindic d’Aran, Luís Carlos Medina, a manifestat era sua satisfaccion per collaborar des deth Conselh Generau d’Aran ena organizacion d’aguesta importanta pròva d’esquí de hons, que demòstre un còp mès era apòsta dera Val d’Aran entà acuélher competicions de nivèu europèu e mondiau en Baqueira Beret.