Eth Conselh Generau d’Aran arrecep eth prèmi ara Melhor Gestion Publica, a trauès dera Agéncia deth Comèrç d’Aran.

Alimentacion Barés e Horn de Pan Fernando Riu son distinguidi laguens dera lista de 50 Establiments Comerciaus Centenaris.

Eth sindic d’Aran, Carlos Barrera, arrecebent eth prèmi ara mielhor gestion publica pera Agéncia deth Comèrç d’Aran.

Era Val d’Aran siguec protagonista ena 14au edicion des Prèmis ara Iniciatiua Comerciau e as Establiments Centenaris que liure era Generalitat de Catalunya e que debanèc en Palai dera Generalitat damb era preséncia deth president, Artur Mas.

En aguesta escadença, eth Conselh Generau d’Aran arrecebec eth prèmi ara Melhor Gestion Publica, pera creacion dera Agéncia deth Comèrç d’Aran, qu’a coma objectiu promòir, aconselhar e dinamizar eth comèrç dera Val d’Aran.

En aguest sens, eth sindic d’Aran, Carlos Barrera, soslinhèc que “pendent er an 2013, eth Conselh Generau d’Aran recuperèc un convèni damb era CCAM (Consòrci de Comèrç, Artesania e Mòda de Catalunya) qu’a comportat ua aportacion de 30.000€ destinadi ara dinamizacion des accions dera Agéncia deth Comèrç d’Aran”.

D’auta banda, es establiments Alimentacion Barés deth pòble de Les e Horn de Pan Fernando Riu en Vielha, sigueren distinguidi damb eth prèmi as Establiments Comerciaus Centenaris, laguens d’un listat de 50 comèrci que se les arreconeish era sua trajectòria pendent mès de 100 ans de servici de qualitat e personalizat as sòns clients, e pera sua adaptacion as cambis e as besonhs de crompa des ciutadans.

Fernando Riu, arrebebent eth prèmi deth sòn establiment centenari: Horn de Pan Fernando Riu (Vielha).

Julian Barés, arrebent eth prèmi deth sòn establiment centenari: Alimentacion Barés (Les).

Carlos Barrera, afirmèc sus es establiments aranesi qu’arreceberen eth prèmi centenari “arrecéber aguest tipe de guerdon signifique que son establiments qu’an dat un servici de qualitat, personalizat as sòns clients e que s’an adaptat as cambis e as besonhs de crompa des clients, causa que merite era nòsta mès prigonda felicitacion”.

Er acte compdèc damb era preséncia deth sindic d’Aran, Carlos Barrera, era conselhèra de Torisme, Comèrç e Consum, Anna Díaz, e es amos des establiments aranesi centenaris premiadi, Fernando Riu e Julián Barés.

“Aguesti prèmis arreconeishen eth gran trabalh que se hè des dera Val d’Aran en sector comerciau, tant des der encastre public coma deth privat. Volem arregraïr ara Agéncia deth Comèrç d’Aran tot er esfòrç entà melhorar era imatge comerciau deth territòri, e voi esténer era mia felicitacion a Alimentacion Barés e Horn de Pan Fernando Riu, entà portar mès d’un sègle en tot deféner eth sòn negòci, coma pròva dera nauta qualitat deth comèrç aranés”, comentaue era conselhèra de Torisme, Comèrç e Consum d’Aran, Anna Díaz.

“Entath Conselh Generau d’Aran, aguesti prèmis signifiquen qu’aguest Govèrn trabalhe ena bona linha, era d’aconselhar e promòir eth nòste comèrç, era linha que vò èster ath costat des associacions de comerçants entà apiejar-les en tot çò de besonh e a de perméter qu’eth comèrç sigue un sector dinamic e capable de crear aucupacion” ahigec era conselhèra Díaz.