• Frederic Vergés siguec escuelhut en 2020 entre d’auti 11 candidats e candidates coma guanhador deth 6au Prèmi Robèrt Lafont pr’amor dera sua longa trajectòria coma militant actiu dera lengua e cultura d’Aran, autant coma per èster un referent en impuls, ensenhament e estudi der aranés. Pr’amor dera pandemia er acte d’autrejament se vedec posposat enquia ara

• Er acte de liurament deth prèmi, qu’aurà lòc eth dia 19 de noveme entàs 17:30 ores ena Glèisa de Mijaran, ei dubèrt ath public e se poderà seguir en dirècte a trauès de Lleida TV

Aguest diuendres, 19 de noveme entàs 17:30 ores, era conselhèra de Cultura dera Generalitat de Catalunya liurarà, ena Glèisa de Santa Maria de Mijaran, eth Prèmi Robèrt Lafont a Frederic Vergés, coma mòstra de reconeishement ara sua longa trajectòria coma militant actiu dera lengua e cultura d’Aran, autant coma per èster un referent en impuls, ensenhament e estudi der aranés.

Era sindica d’Aran, Maria Vergés, a afirmat qu’eth premiat “merite aguest reconeishement per nombrosi motius, especiaument pr’amor qu’a estat, ei e serà eth referent de fòrça generacions en impuls, ensenhament e estudi der aranés, mès tanben pera sua categoria umana que li a hèt a estimar eth sòn país e era sua lengua e cultura, transmetent es coneishements e valors a totes es persones qu’an auut eth plaser de coneisher-lo”.

Era candidatura de Frederic Vergés, presentada peth govèrn deth Conselh Generau d’Aran en junhsèga de 2020, siguec escuelhuda entre d’autes onze presentades per institucions, universitats e era participacion ciutadana dubèrta, peth jurat format pera alavetz consellera de Cultura, Mariàngela Vilallonga, er alavetz sindic d’Aran, Francés Boya, eth president der Institut d’Estudis Aranesi, Josèp Loís Sans, er alavetz cap de servicis territoriaus deth Departament de Cultura en Lleida, Miquel Àngel Cullerés, e es responsables d’aranés ena Direccion Generau de Politica Lingüistica, Xavier Moral, e en Conselh Generau d’Aran, Veronica Barés.

Rebrembam qu’eth Prèmi Robèrt Lafont, concedit peth departament de Cultura dera Generalitat de Catalunya, a coma objectiu reconéisher e premiar as persones o entitats que s’agen distingit pera defensa, projeccion e promocion dera lengua aranesa e occitana en totes es sues variants, en quinsevolh punt deth domèni lingüistic.

Frederic Vergés Bartau a ua longa trajectòria coma militant actiu dera lengua e cultura d’Aran. De 1974 ençà a impartit classes e corsi d’aranés autant tà adults coma tàs alumnes des estudis aranesi, mèstre de mèstres e responsable deth reciclatge deth professorat, siguec eth prumèr defensor dera apertiença der aranés ath gascon, a estat membre dera Comission entar estudi dera Normativa Lingüistica Aranesa, director deth Centre de Normalizacion Lingüistica deth Conselh Generau d’Aran e president dera Seccion de Lingüistica der IEA enquia 2011, e actuaument ei president deth Centre d’Estudis Aranesi

Ei autor e coautor de lèu ua vintea de publicacions en aranés, e deth prumèr diccionari aranés, e de mès d’un detzeat de publicacions didactiques en aranés entara escòla e, ena actualitat, trabalhe ena elaboracion deth diccionari castelhan-aranés damb ues 45.000 entrades, ua òbra fòrça de besonh e demorada e que daurirà un abans e un dempús en usatge dera lengua d’Aran e que veirà era lum en brèu.

Er acte de liurament d’aguest prèmi, dubèrt ath public, se retransmeterà en dirècte a trauès de Lleida TV.