Eth Conselh Executiu der Generalitat de Catalonha a aprovat declarar Ben Culturau d’Interès Nacionau era Glèisa dera Purificacion de Bossòst, ena Val d’Aran. Eth monument ei un des melhors exemples dera arquitectura romanica aranesa deth sègle XII, pr’amor qu’a conservat ua grana unitat estilistica e cronologica.

Plaçada en nuclèu ancian de Bossòst, ei ua notable bastissa romanica damb planta basilicau de tres naus. Coma acostume a èster abituau ena Val d’Aran, maugrat que non i a documentacion escrita deth bastiment dera glèisa, se n’a pogut rehèr era cronologia a compdar dera analisi des elements arquitectonics e artistics deth monument e der estudi comparatiu damb d’autes bastisses pròpères.

Era prumèra referéncia conservada ei der an 1313. Era glèisa siguec bastida possiblaments es dues etapes: era prumèra, a shivau entre es sègles XI e XII, quan se deuie edificar eth campanau. E, era dusau, pendent era dusau mitat deth sègle XII, quan se bastic era bastissa. En an 1743, en tot aubedir un mandat istoric des avesques de Comminges, se lheuèc ua sacristia ath costat nòrd dera absida centrau. En an 1983, arraïtz d’ua accion importanta de restauracion en monument, s’assolidèc eth campanau, damb era recuperacion des sues dubertures, er esbaussament dera sacristia e era reconstruccion dera absidiòla desapareishuda.

Era declaracion de BCIN tanben compren eth conjunt de bens mòbles restacadi istoricaments ara bastissa. Destaque un fragment de pintura mural ath tremp ena absida centrau dera dusau mitat deth sègle XIV, a on son representades era Epifania e era scèna de Jesus en temple en tot discutir damb es doctors. Auti bens destacadi son tres pès d’autar monolitics, possiblaments romanics; tres frontaus d’autar de husta talhada e policromada d’estil barròc; ua arròda de campanes deth sègle XVIII; ua crotz processionau d’argent sobredaurada, obrada per argentèr de Barcelona, Pere Farrell, er an 1614; dues pòrtes de husta de doble batent, a on i son talhadi es simbèus pontificaus e crotzes de Malta; un conjunt deth monument de Setmana Santa, integrat per sèt pèces de teles pintades ath tremp damb scènes dera Passion, deth sègle XVII, e ua pica baptismau e un aiguasenhèr, objèctes liturgics d’orfebreria e cinc campanes des sègles XVIII e XIX.