Vielha, 12 d’octobre de 2018.- Eth CEI Val d’Aran de Casau organize ua naua capsula formatiua gratuïta sus “Era excelléncia ena atencion ath client”, que se realizarà eth pròplèu diuendres 19 d’octobre de 10:00 a 14:00 ores.

Era capsula formatiua serà impartida per Ana Campos Tomás, Diplomada es Sciéncies Empresariaus e Relacions Laboraus, e Mastèr era Direccion de Recorsi Umans, ath delà d’èster Coach personau.

Era satisfaccion deth client a d’èster un objectiu irrenunciable ena prestacion de servicis, compréner as clients, meter-se en sòn lòc, escotar es sòns besonhs e es sues demandes. Cau èster conscienti que non toti es usatgèrs son iguals e se les a de tractar de diferenta manèra e personalizada entà poder aufrir ua atencion respectuosa, eficaça e eficienta.

Arrebrembar qu’es capsules formatiues s’impartissen en madeish CEI Val d’Aran de Casau, Plaça naua, 1, e son organizades peth CEI Val d’Aran e eth Conselh Generau d’Aran en collaboracion damb era Deputacion de Lhèida e GlobaLleida, damb eth supòrt deth Departament d’Enterpresa e Aucupacion dera Generalitat de Catalonha, Catalonha Empren e eth Hons Sociau Europèu.

Es inscripcions entà participar en aguesta naua capsula formatiua se pòden formalizar en www.ceivaldaran.org o tanben en tot picar ath Telf. 973 64 18 01.

Es capsules deth CEI Val d’Aran son gratuïtes e s’adrecen a totes es persones o enterpreses interessades en agranir era sua formacion. Totes es persones inscrites auràn de portar eth DNI, NIE o fotocòpia deth document.