Eth dimenge 18 de març, darrèr des tres dies de competicion dera Finau OPA Cup FIS en Beret, Sara Pellegrini, qu’eth dissabte 17 ja s’imposèc ena pròva de Distància, e eth francés Jean Tiberghien pugèren çò mès naut deth pòdium ena carrèra de Persecucion.

Era equipa espanhòla artenhec dus Top 20 damb era 18au posicion d’Imanol Rojo enes 15 km Persecucion estil liure e era 20au plaça dera joenissima aranesa María Iglesias enes 10 km ena categoria U20.

 

                              Era hondista aranesa, Maria Iglesias Barés, 20au enes 10 km ena categoria U20. 

 

Deth 16 ath 18 de març, era estacion de Baqueira Beret siguec eth scenari des finaus dera OPA Cup (tanben coneishudes coma Alpen Cup), enes quaus participèren 140 esportistes der elèit europèu der esquí de hons, 12 d’eri espanhòus.

Eth traçat mercat en Beret damb un recorregut de 5 km a on es hemnes U20, sènior e es òmes U20 dauen dus torns en tot somar 10 km e es òmes dera maximala categoria esquiauen 3 còps en tot corbir ua distància de 15 km. Se tractaue d’un circuit damb tres fòrtes rampes de pujada qu’ac heren fòrça tecnic damb ua duresa que se vedec agreujada pera nautada deth Plan de Beret a 1.850 m.

Ena competicion de “pursuit” (persecucion) es gessudes des competidors s’esgraonec d’acòrd eth resultat dera soma des sòns tempsi enes competicions des dus dies anteriors (Sprint e Distància). Atau eth qu’auie eth melhor temps gessie prumèr, eth dusau seguie ath prumèr, e atau successivaments. Guanhaue er esquiador que somaue eth menor temps des tres dies.

En hemnes sènior, eth pòdium tornèc a auer coma protagonista ara italiana Sara Pellegrini, qu’eth dissabte ja guanhèc era Distància en classic, e eth dimenge s’imposèc en “pursuit” damb un temps (en tot somar es tres carrères) de 1:05:03, seguida dera alemanha Antonia Fraebel 1:05:32 e en tresau gradon deth pòdium entrèc era transalpina Anna Comarella 1:05.28. En òmes sènior, es francesi, qu’eth diuendres en Sprint dejà aucupèren es prumèrs lòcs, tornèren a pujar çò mès naut deth pòdium damb 1:24:21 Jean Tiberghien siguec prumèr e Jules Lapierre li seguic damb 1:24:26. Tresau siguec er italian Simone Dapra damb 1:24:32.

Ena categoria d’U20 es hemnes franceses aucupèren totauments eth pòdium damb er aur entà Flora Dolci damb 50:39:0, Laura Chamiot dusau 51:09:9 e era tresau siguec Melissa Gal 52:04:3. En òmes U20 un resultat disputadissim entre eth prumèr, Hugo Lapalus damb 57:27.3, seguit der italian Luca del Fabbro qu’eth sòn còmput finau siguec de 57:27:4. Eth tresau en pòdium siguec eth tanben transalpin Davide Graz damb 57:34:7.

 

                              Eth tolosan, Imanol Rojo, en òmes sènior finalizèc 18au.

 

En çò que tanh as espanhòus soslinhar es dus top-20 artenhudi eth dimenge per Imanol Rojo e María Iglesias. Eth tolosan en òmes sènior siguec eth 18au damb 1:26:47 e era aranesa merquèc 57:38:9. Rojo hège balanç des sòns tres dies enes competicions OPA en tot afirmar qu’ère mès que mès content deth Sprint deth diuendres a on acabèc 14au e tanben damb era Persecucion deth dimenge qu’auie melhorat diuèrsi lòcs era sua posicion dempús dera carrèra de Distància deth dimenge qu’ath sòn semblar siguec era mès loisha des sues accions.

Per çò que tanh ad aguest eveniment, eth conselhèr delegat de Baqueira, Francis Coll, soslinhèc qu’ “ei volontat de Baqueira acuélher aguest tipe de competicions de naut nivèu, per açò homologam es circuits pera FIS hè ua sason, pr’amor qu’ei era manèra de promòir esportivament era estacion e es hondistes des clubs e RFEDI ath delà d’ajudar a hèr era estacion mès coneishuda internacionauments”. En aguest sens tanben parlèc eth president dera RFEDI, May Peus España, que certifiquèc qu’ “era organizacion per part dera equipa de Baqueira a estat impecabla e era estructura umana entad aguestes pròves s’a vist refortilhada damb era equipa de delegats tecnics qu’an anat per part dera federacion”. Peus dèc es gràcies ara estacion pera sua implicacion e tanben as clubs e institucions dera Val d’Aran restacades ar eveniment. Fin finau, eth director comerciau de Baqueira, Xavier Ubeira, comentèc qu’ “an estat 3 dies damb un gran espectacle e Beret a demostrat, e atau ac an comentat es esportistes participants, qu’ei ua grana destinacion entà organizar competicions de hons deth mès naut nivèu”.

Resultats finaus circuit OPA Cup

Hemnes http://bit.ly/2FLukfu
Òmes http://bit.ly/2G4BSti

Resultats Persecucion Dimenge 18

Hemnes Senior 10 km
1-Sara Pellegrini ITA 1:05:03
2-Antonia Fraebel GER 1:05:32
3-Anna Comarella ITA 1:05.28
…
29-Marta Cester ESP 1:13:29
30- Lydia Iglesias ESP 1:15:17

Òmes senior 15 km
1-Jean Tiberghien FRA 1:24:21
2-Jules Lapierre FRA 1:24:26
3-Simone Dapra ITA 1:24:32
….
18-Imanol Rojo ESP 1:26:47
39-Sergi Brau ESP 1:44:11

U20 Hemnes 5 km
1-Flora Dolci FRA 50:39:0
2-Laura Chamiot FRA 51:09:9
3-Melissa Gal FRA 52:04:3
….
20-María Iglesias ESP 57:38:9
21-Maria Sellés ESP 59:03:5
22-Alba Puigdefábregas ESP 1:00:10

U20 Òmes 10 km
1-Hugo Lapalus FRA 57:27.3
2-Luca del Fabbro ITA 57:27:4
3-Davide Graz ITA 57:34:7
…
25-Jaume Pueyo ESP 1:04:39
26-Gral Sellés ESP 1:06:29
31-Gerard Palomo ESP 1:07.33
30-Cesc Colell ESP 1:08:06

 

Mès informacion:
prensa@baqueira.es
www.baqueira.es @baqueira_beret
blog.baqueira.es
www.facebook.com/BaqueiraBeretEsqui
www.twitter.com/baqueira_beret

 

 

Vielha, 19 de març de 2018

 

 

Conselh Generau d’Aran: Núria Sanjuan

Hònt e Fotos: Baqueira Beret