• Era amassada mantenguda eth passat 17 de seteme entre era directora generau de Desvolopament Rurau, Innovacion e Politica Forestau e eth sindic d’Aran servic entà mostrar ath Ministèri d’Agricultura, Pesca e Alimentacion era necessitat d’incorporar ajudes dera PAC ad aguest sector

• Era PAC se trape en aguest moment en fasa d’elaboracion de propòstes des païsi membres, de forma que se constituirà un grop de trabalh damb er objectiu de conciliar era ramaderia extensiva damb era fauna sauvatge

Deuant es darrèri e reïteradi atacs der os Cachou ath bestiar equin, eth Conselh Generau d’Aran continue cercant possibles solucions ad aguesta grèu problematica qu’afècte de forma dirècta as ramadèrs aranesi.

Ena amassada mantenguda eth darrèr dimars, 17 de seteme, entre era directora generau de Desvolopament Rurau, Innovacion e Politica Forestau, Isabel Bombal, e eth sindic de Aran, Francés Boya, s’acordèc estudiar era incorporacion ena naua Politica Agricòla Comuna (PAC) de mesures e ajudes as pagesi de ramaderia extensiva afectadi pera predacion de grani carnivors.

“Degut ara grèu situacion que se viu damb eth comportament predador der os Cachou ena Val de Aran, er hèt d’auer ajudes complementàries entà ajudar as ramadèrs que sofrissen es conseqüéncies, ei vitau tath Conselh”, afirme eth sindic de Aran, Francés Boya.

Dempús d’aguesta amassada mantenguda entre eth sindic e era directora generau, s’a acordat tornar a amassar-se pròplèuments damb tecnics deth Ministèri d’Agricultura, Pesca e Alimentacion e deth Conselh Generau entà cercar mesures mès avientes que permeten minimizar es damatges e compensar as ramadèrs pes problèmes qu’ocasione era convivéncia damb aguesti animaus.

Dempús d’auer corroborat un cincau atac a bestiar equin per part de Cachou en pòc mès de dues setmanes, eth govèrn aranés exigís era retirada d’aguest exemplar deth territòri e sollicite a totes es administracions implicades que reaccionen e prenen es mesures de besonh entà acabar damb aguesta drastica situacion.