• De moment se constate de manèra preliminar que poirie auer estat atacat per un aute os e que queiguec d’uns 40m

Eth servici d’Ecopatologia de Fauna Sauvatge (SEFaS) dera Universitat Autònoma de Barcelona (UAB), a comunicat es prumèri resultats dera necròpsia der os Cachou que, amassa damb era acta de remassada deth cadavre, an permetut verificar de manèra preliminar ua agression produsida fòrça probablement per un aute os e ua queiguda d’uns 40m per un terren molt escarpat.

Eth terren per a on aurie rodat e queigut Cachou dejà podec èster inspeccionat en moment de recuperar eth còs der animau, mentre que pendent er examen dera necròpsia se podec constatar que presentaue herides perforants damb emorràgies en costat esquèr deth cap (dejós dera aurelha e còth proximau), que corresponerien a herides antemortem. En tractar-se d’un mascle adult, se dedusís que sonque un aute os pòt auer-li causat aguestes lesions.

Er os mostraue un bon estat corporau e non s’a observat cap lesion macroscopica ne organ vitau alterat. A despièch d’açò, se realizaran pròves complementàries entà descartar causes infectocontagioses o d’autes. Degut ara situacion de confinament provocada peth COVID-19, es laboratòris non trabalhen ath ritme abituau e es resultats des analitiques pòden endarrerir-se quauques setmanes. Enquia alavetz non se poirà elaborar er informe complèt dera necròpsia.