• Eth 14 d’octobre aurà lòc “Era net des boherons” activitat de descobèrta e reconeishement des espècies de micromamifèrs dera Val d’Aran.

Un an mès, eth Conselh Generau d’Aran a trauès deth sòn Departament d’Agricultura, Ramaderia e Medi Naturau a organizat “Era net des boherons” activitat tà petiti e grani, entà descorbir e reconéisher es boherons e d’auti micromamifèrs dera Val d’Aran en tot apréner eth metòde d’estudi scientific d’aguest grop de fauna.

Era activitat ei dirigida a tota era familha e convide a passar ua estona divertida en tot cercar as petiti mamifèrs que viuen amagadi enes nòsti bòsqui.

Programa:

Dissabte 14 d’octobre 2017 (Refugi dera Honeria-Val de Toran)

19h00: Charrada audiovisuau “Micromamifèrs, animadors secrets des nòsti bòsqui”.

20h00: Sopar.

21h30: Exploracion nocturna en ‘’bòsc des boherons’’ mejançant era prospeccion de dispositiu de trampeg.

Entà hèr mès comòde eth seguiment dera activitat, eth refugi aufrís servici de lotjament e restauracion (menú 14€ e menú infantil 6€). Mès tanben i a era possibilitat de portar eth sopar en topinet.

Era activitat ei gratuïta, mès es places son limitades, per aquerò cau formalizar era inscripcion telefonant tath Conselh Generau d’Aran (973 64 18 01) o enviant un corrèu a g.vilo@aran.org, persona de contacte Gerard Viló.

Vielha, 6 d’octobre de 2017

Conselh Generau d’Aran: Núria Sanjuan