Aguest veïcul de recenta incorporacion, substituís a un aute de similares caracteristiques, que resultèc afectat pes aiguats de junh der an passat, ei adscrit ara empresa TESVA (Transpòrts d’Emergéncies Sanitàries Val d´Aran), e serà destinat ath transpòrt sanitari adaptat a persones damb capacitat de mobilitat redusida.

De manèra programada, preste servici jornalièr de deluns a diuendres as usatgèrs de reabilitacion der Espitau Val d’Aran e ath centre aucupacionau d’ADDA. Era sua utilizacion ei regulada jos era prescripcion deth SABS (Servici Aranés de Benèster e Salut) cada viatge que se precise un traslat sanitari adaptat.

Eth nivèu d’activitat annau mejana ei de: 1800 viatges, en tot transportar 2700 persones e en tot realizar un totau de 40.000Km.

“Aguest veïcul supausarà melhorar es desplaçaments sanitaris dera gent dera Val d’Aran damb dificultats ena mobilitat” a soslinhat eth conselhèr de Salut e Benèster d’Aran, Eduardo Valdecantos.

Caracteristiques tecniques

Ei un furgon de 8 places, damb dobla pòrta laterau, rampa d’accès posteriora, adaptat entath transpòrt d’enquia tres cagires d’arròdes. Dispause de traccion integrau.

Eth sòn conductor ei capacitat coma tecnic de transpòrt sanitari, dispause d’un equip de supòrt vitau Basic e d’un desfibrillador, ath delà a comunicacion permanentaments per radio damb era centrau d’Emergéncies Pompièrs d’Aran.

En paraules deth sindic d’Aran, Carlos Barrera, “des deth Conselh Generau d’Aran, avaloram fòrça positivaments aguest tipe de collaboracion public/privada. Aguesta ei era dusau ajuda qu’era Val d’Aran arrecep dera Obra Social “la Caixa”. Era prumèra siguec ua aportacion economica de 300.000€ destinada ara recuperacion des accèssi naturaus dera Artiga de Lin, tanben afectadi pes inondacions d’est an passat”.