• Mès de 1.500 espectadors non s’an volut pèrder er espectacle esportiu que les aufrís aguesta dimenjada Baqueira Beret, a on ath delà an pogut degustar era òlha aranesa en village.

• Lucas Eguibar, rider dera RFEDI, a guanhat era classificatòria des finaus dera Copa deth Mon de Snowboard Cross (SBX) FIS de Baqueira Beret.

 

 

En un ambient unic e espectacular, Baqueira Beret a celebrat es classificatòries masculines dera grana finau dera Copa deth Mon de Snowboard Cross (SBX) FIS que se disputarà deman, 20 de març, a on es riders baisharàn en grops de 4 e es 2 prumèrs de cada manja passaràn ara següenta ronda enquia arribar ara grana finau.

 

     Pau Donés ena village

      Era infanta Elena damb era sua hilha Victoria Federica, non s’an volut pèrder er espectacle.

 

Eth prumèr classificat d’aué a estat eth rider dera RFEDI, Lucas Eguibar, seguit d’Alessandro Haemmerle e tresau Aleksandr Guzachev.

Deman, se realizaràn es classificatòries femenines.

 

 

Mès de 1.500 persones an gaudit d’un espectacle esportiu unic ena estacion d’esquí dera Val d’Aran, Baqueira Beret, a on ath delà en village, plaçat ena mèta, s’a celebrat ua naua edicion d’ “Era Òlhada”, er eveniment gastronomic dedicat a un des plats tipics dera Val d’Aran: era òlha aranesa, que se n’an servit 350 racions.

 

 

“Era Òlhada ei ua des melhores manères de poder hèr conéisher era nòsta gastronomia a toti. En tot profitar er eveniment dera Copa deth Mon de Snowboard Cross FIS que se celèbre aguesta dimenjada en Baqueira Beret, tant es espectadors coma es jornalistes pòden degustar era òlha aranesa e d’auti productes dera Val d’Aran”, a comentat era conselhèra de Torisme e Desvolopament Economic d’Aran, Anna Díaz.

 

 

Deman, 20 de març, en village ath delà de poder degustar productes dera Marca Garantia dera Val d’Aran, a compdar des 14:30 ores se celebrarà era grana hèsta de clausura damb un DJ convidat e fòrça suspreses!

 

• Autobusi enquia Beret

Era organizacion deth Campionat deth Mon de SBX a metut servici d’autobusi enquiath Plan de Beret. Eth servici a connexion en Baqueira damb es rotes deth transpòrt intèrn dera Val d’Aran. Oraris:

Dimenge, 20 de març:

Baqueira – Beret 10:30 ores
Baqueira – Beret 11:30 ores
Beret – Baqueira 15:00 ores

 

 

Vielha, 19 de març de 2016

 

Conselh Generau d’Aran: Núria Sanjuan