• Es dues activitats compden damb eth supòrt deth Conselh Generau d’Aran.

Èm Aran, era organizacion sense interès lucratiu, torne un an mès, ara, damb era Olimpiada infantila que se harà eth 24 d’agost en Arties, damb jòcs esportius, corses tàs neishuts e neishudes entre es ans 2013 e 2021. Dempús i aurà ua langoïssada populara entà toti/es. Eth prètz dera incripcion qu’ei de cinc euros.

Èm Aran despartirà enguan un paquet de bèques per un valor de cinc mil euros damb hons pròpis entà esportistes d’elèit e esportistes aranesi en projeccion. Addicionauments tanben liurarà mil cinc cents euros entàs entitats que desvolòpen eth fotbòl en Aran gràcies as ingrèssi artenhudi enes tornegi organizadi pera fondacion.

Èm Aran Sport Foundation, creada en 2020 per un corròp de joeni e joenes  aranesi, se finance mejançant era organizacion d’eveniments e subvencions e aportacions d’entitats publiques e privades.

Enguan, Èm Aran collabòre tanben ena organizacion dera Corsa e Caminada des 15 Pòbles damb Volentaris d’Aran qu’ei ua classica deth trail aranés que se harà eth dimenge 25 d’agost.

Era Corsa des 15 Pòbles, qu’enguan hè era 27au edicion, cònste de:

Es corses en distàncies de 21 km, 11 km e 5 km.

Es caminades de 15 km e 5 km.

Es dues trobades ludiques e esportives compden damb eth supòrt deth Conselh Generau d’Aran. Es inscripcions online son dubèrtes enquiath dijaus 22 d’agost e es inscripcions presenciaus se haràn es dies 23 e 24 d’agost ena Plaça d’Aran, en Vielha.

Vielha, 20 d’agost 2024