• Eth Conselh Generau d’Aran amièc a tèrme era passada tardor un procès de participacion entà conéisher era opinion e prepauses dera ciutadania aranesa entorn ath servici de transpòrt intèrn deth territòri, damb er objectiu de premanir era naua licitacion d’aguest servici

• Es resultats d’aguest procès de participacion ciutadana, que compdèc damb era participacion de 161 persones, mòstre que, en generau, eth servici a ua bona valoracion mès, i a quauqui aspèctes a melhorar, entre eri,  era sostenibilitat, er accés ara informacion, era sensibilizacion der emplec deth transpòrt public, eth servici nocturn e era freqüéncia de pas

En tot premanir era naua licitacion deth servici de transpòrt intèrn dera Val d’Aran, eth Conselh Generau d’Aran impulsèc eth passat mes d’octobre un procès de participacion ciutadana entà conéisher era opinion e prepauses des usatgèrs e usatgères d’aguest servici.

Es resultats d’aguestes enquèstes, responudes per un totau de 161 persones, mòstren que, en generau, eth servici a una bona valoracion mès, segontes era ciutadania aranesa, i a quauqui aspèctes a melhorar.

“Deth Conselh Generau d’Aran ençà volíem compdar damb era participacion des ciutadans e ciutadanes qu’empleguen eth servici, pr’amor que son eri es que melhor coneishen quini son es aspèctes a melhorar e mos an transmetut quini son es sòns principaus besonhs en airau de transpòrt intèrn, çò que mos ajudarà a definir melhor es critèris qu’an de regir era naua licitacion deth servici”, afirmaue eth conselhèr d’Economia, Torisme e Promocion economica, Juan Antonio Serrano.

Es principaus airaus de melhora, segones es enquestadi, son era sostenibilitat, er accès ara informacion, era sensibilizacion der emplec deth transpòrt public, eth servici nocturn e era freqüéncia de pas. Totes aguestes qüestions seran tengudes en compde en pròplèu servici, en tot impulsar quauques pròves pilòt tà avalorar era sua viabilitat.

En çò que hè ara sostenibilitat, eth govèrn d’Aran dejà trabalhe entà que, ena naua licitacion, es veïculs complisquen, aumens, damb era normativa d’emissions Euro VI.

Tanben se prevé melhorar eth sistèma d’informacion deth transpòrt public as usatgèrs, en tot implementar un servici entà informar en tot moment sus er estat dera circulacion en temps reau e comunicar es possibles incidéncies. Atau madeish, s’amiaràn a tèrme campanhes de sensibilizacion entà fomentar er emplec deth transpòrt intèrn. Totun, en aguest sens, cau destacar qu’en 2022 eth servici a artenhut eth màger nombre d’usatgèrs, damb 196.031 viatgèrs, un 20,27% mès qu’enes darrèri cinc ans e un 37,5% mès respècte der an anterior, eth 2021, afectat pera pandèmia.

Per çò que hè ath servici nocturn, eth Conselh Generau d’Aran, en dates puntuaus dejà a recuperat aguest servici entàs persones que vòlen gésser de net e an de besonh desplaçar-se. Un servici que deishèc de prestar-se hè dejà uns ans pr’amor dera manca d’usatgèrs.

En darrèr lòc, per çò que hè a ampliar era freqüéncia de pas e avalorar apropar era demanda tà d’auti pòbles, s’estúdie balhar solucions a trauès de convènis damb institucions publiques e privades. Totun, cau destacar qu’eth servici actuau de transpòrt intèrn dera Val d’Aran ei eth mès complèt deth Naut Pirenèu e cap aute territòri rurau vesin compde damb un servici damb tanta implementacion territoriau e freqüéncia de pas.