Era poblacion d’ossi enes Pirenèus arribe as 70 exemplars

Eth Grop de Seguiment Transfonterèr der Os Ròi enes Pirenèus, deth quau forme part eth Conselh Generau d’Aran, a amiat a tèrme un balanç des actuacions de seguiment d’aguesta espècia en 2021 en Aran, Catalunya, França, Andòrra, Aragon e Navarra
En Aran e Catalunya, eth nombre d’ossi detectadi er an passat siguec de 38, entre eri 9 cadèths

Eth Grop de Seguiment Transfonterèr der Os Ròi enes Pirenèus (GSTOP) a hèt eth balanç annau dera poblacion d’os ròi de 2021 e des accions de seguiment e conservacion amiada a tèrme pendent eth passat exercici. Eth Grop de Seguiment ei format per representants deth Conselh Generau d’Aran, eth Departament d’Accion Climatica, Alimentacion e Agenda Rurau, eth Còs d’Agents Ruraus, es govèrns d’Andòrra e França, Aragon, Navarra e era Fundación Oso Pardo.

Pendent 2021 s’a comptabilizat ua poblacion de 70 exemplars d’os enes Pirenèus. Aguesta chifra correspon ath nombre minim d’ossi detectadi en un an determinat e se revise annauments. Atau madeish, gràcies as donades obtengudes en 2021, se constate qu’eth nombre d’ossi d’ans anterios a creishut: en 2018 se fixèren 52, en 2019 eth nombre siguec de 59 e en 2020 i auec 68 exemplars.

Per çò que hè ath sèxe dera poblacion identificada e comptabilizada en 2021, i a 34 femelhes e 32 mascles. Des 70 exemplars, 36 son adults e 19 son subadults; des 15 cadèths, i a 6 femelhes, 5 mascles e 4 de sèxe non identificat.

Er airau geografic de preséncia der Os Ròi enes Pirenèus compren ua superfícia de 6.500 km2.

Dusau chifra recòrd de neishements

Per çò que hè ath nombre de neishements, s’an registrat en totau 15 naues cries de ueit femelhes diferentes. Se tracte dera dusau chifra mès nauta enregistrada, dempús de 2020. Es femelhes que s’an reprodusit son Caramelles (damb 2 cadèths), Caramellita (3), Sorita (3) Beret (1), Bulle (1), Reglisse (1), New18-04 (2) e New18-06 (2). Es darrères cinc femelhes s’an reprodusit per prumèr còp. E cinc mascles an agut cadèths, entre eri eth mascle Goiat.

Entre 1996 e 2021 an neishut un totau de 114 cries. Per çò que hè a exemplars que se dan per mòrts o desapareishudi pendent 2021, era chifra ei de 9. En aguest recompde de baishes se comptabilizen es exemplars des quaus i a evidéncia dera mòrt o ben non s’a cap indici dempús de dus ans.

Seguiment en Catalonha e l’Aran

Per çò que hè ath seguiment dera espècia en Aran e Catalunya, pendent 2021 s’an remassat 1.194 indicis d’os. Es donades mès importantes son es mòstres de peus (462), eth fototrampeig (375) e es excrements remassadi (124). Tanben s’an amiat a tèrme 47 observacions. En tot eth Pirenèu s’an detectat un totau 2.979 indicis o rastres.

Ath delà, s’an analisat enes laboratòris dera Universitat Autonòma de Barcelona e eth laboratòri francés Antagène mès de 525 mòstres entara identificacion genetica.

S’an detectat 38 exemplars d’os ròi ena Val d’Aran, Pallars Sobirà e Alta Ribagorça. Se detectèc ara femelha Caramelles damb dues cries d’un an e era femelha Caramellita damb tres cries, des quaus sonque n’a sobreviscut ua, hilh deth mascle Goiat, qu’est an passat non se localizèc en Catalunya. Tanben s’a constància des femelhes Bulle e Beret damb ua cria e s’a detectat fotograficament ua femelha damb dus cadèths, non identificada geneticament.

Atau, eth recompde finau dera part catalana e aranesa ei de 23 adults, 6 subadults e 9 cadèths, damb 17 mascles e 19 femelhes e 2 cadèths de sèxe qu’encara non s’a pogut determinat.

LoupO, Un projècte transfronterèr centrat enes poblacions d’os e lop

Er objectiu principau deth projècte LoupO consistís en desvolopar un plan transfronterèr integrat e estandardizat entara monitorizacion e seguiment des poblacions d’os e lop des Pirenèus e crear ua basa de donades comunes entre païsi.

Aguest projècte, damb un pressupòst totau de 1.250.109 €, ei cofinançat en un 65% peth Hons Europèu de Desvolopament Regionau (FEDER) a trauès deth Programa Interreg V-A Espanha-França-Andòrra.