• Eth govèrn deth Conselh Generau d’Aran mòstre era sua satisfaccion deuant aguesta redubertura dempús de mès d’un an de barrament unilaterau per part der Estat Francés, ua fòrça bona notícia entara Val d’Aran en generau e entath Baish Aran en particular, que tornarà a recuperar era sua dinamica de cooperacion e vesiatge damb eth parçan de Comminges

Eth prefècte dera Nauta Garona, Étienne Guyot, a anonciat oficiaument era redubertura deth pòrt deth Portilhon entath pròplpèu dimars, 1 de hereuèr.

Era sindica d’Aran, Maria Vergés, a mostrat era sua satisfaccion deuant d’aguest anonci e a afirmat que: “eth Portilhon ei un pas fòrça important entàs abitants d’Aran e deth parçan de Comminges, especiaument entàs poblacions de Bossòst e Luchon, qu’an de besonh aguesta via entà complementar servicis comerciaus, sanitaris, esportius o educatius, entre d’auti, e poder recuperar era sua dinamica de cooperacion e vesiatge ei ua molt bona notícia”.

Pendent aguest darrèr an, deth Conselh Generau d’Aran ençà s’an amiat a tèrme demanes a diuèrsi estaments entà arténher aguesta dubertura. En aguest sens, era sindica d’Aran a volut arregraïr “es gestions hètes peth secretari tara Ruralitat der Estat Francés, Joël Giraud, atau coma deth secretari generau tath Rèpte Demografic, Francés Boya, e er alcalde de Bossòst, Amador Marqués, damb qui auem hèt arribar conjuntament en diuèrses ocasions, autant ath govèrn francés coma espanhòl eth besonh de redaurir eth Portilhon”.