Era principau nauetat ei qu’era opcion der aranés s’includirà enguan enes pròves d’accès ara universitat (PAU) enes enonciats der examen d’Istòria, matèria obligatòria entà toti es alumnes

Vielha, 30 de mai de 2019.- Eth Dr. Jesús M. Prujà, Cap deth Burèu d’Accès ara Universitat dera Generalitat de Catalonha, a aufrit ua conferéncia informativa sus es PAU as alumnes de bachelierat e de cicles formatius der INS d’Aran.

Enguan, dempús deth convèni signat entre, eth Conselh Generau d’Aran, era Generalitat e era Universitat de Lhèida (UdL), enes Pròves d’Accès ara Universitat de 2019 a qué se presenten un trenteat d’estudiants d’Aran, s’includirà era opcion der aranés enes enonciats der examen d’Istòria, matèria obligatòria entà tot er alumnat.

D’aguesta manèra se met de manifèst eth compromís de dar responsa ara diversitat lingüistica de Catalonha. Damb era preséncia der aranés enes PAU se fomente er emplec, era difusion e era coneishença d’aguesta lengua, era sua normalizacion e eth respècte as drets lingüistics deth ciutadan.

Era oficialitat der aranés garantís qu’es estudiants poguen respóner quinsevolh examen en aranés, exceptat es de lengües.

Era Universitat de Lhèida serà era encargada de provedir es mecanismes de besonh en cas de que siguesse de besonh era traduccion des responses as examens. En successives convocatòries, era Comission de Seguiment designada poderà ampliar es matèries en qué s’establisque era opcion des enonciats en aranés.

Es PAU de 2019

Es Pròves d’Accès ara Universitat (PAU) deth 2019 se realizaràn eth 12, 13 e 14 de junh ena convocatòria ordinària, e eth dia 26 deth madeish mes se coneisheràn es resultats.

Ena convocatòria extraordinària, es examens auràn lòc eth 3, 4 e 5 de seteme e es resultats se haràn publics eth 17 de seteme.

Es estudiants s’auràn d’examinar de manèra obligatòria ena fasa generau dera matèria d’Istòria, es tres lengües (Catalan, Castelhan e Lengua estrangèra) mès ua matèria de modalitat a escuélher entre es 4 comunes d’opcion (Matematiques, Matematiques aplicades as Sciéncies Sociaus, Latin e Fondaments des Arts).

Er an 2018 eth 97’68% des alumnes en Catalonha superèc es PAU en junh, e un 64’30% ena convocatòria de seteme.

Ei important entar aranés èster present en aguestes pròves e serie positiu qu’es alumnes d’Aran s’impliquèssen ena normalizacion dera lengua pròpia deth país, ben escuelhent er enonciat en aranés o ben responent as pròves que volguen.