Era Deputacion destinarà 500.000 € entad equipament deth dusau quirofan dera ampliacion der airau quirurgic der espitau dera Val d’Aran

Vielha, 15 de hereuèr de 2019.- Era presidenta dera Deputacion de Lhèida, Rosa Maria Perelló a visitat era Val d’Aran a on a mantengut desparières amassades damb eth sindic d’Aran, Carlos Barrera e es membres deth Govèrn, e posterioraments a presidit ua jornada de trabalh damb conselhèrs, bailes e presidents d’EMD d’Aran.

En finalizar era reünion, era presidenta dera Deputacion de Lhèida a explicat qu’era amassada a servit entà auançar ena estreta collaboracion que manten era institucion damb eth Conselh Generau d’Aran e entà aprigondir enes desparièrs projèctes compartidi.

Rosa Maria Perelló destaquèc era inversion que realize era Deputacion de Lhèida ena 3au fasa de melhora dera carretèra de Vilamòs, damb un pressupòst de 1.860.000 €. Es òbres començaràn aguesta primauera dempús d’auer executat es darrères expropriacions entà amiar-les a tèrme. Perelló tanben a hèt mencion ara inversion dera conselheria de Politiques Digitaus e Administracion Publica dera Generalitat de Catalonha e era madeisha Deputacion de Lhèida entà que toti es municipis e nuclèus de poblacion de Lhèida agen connexion damb ample de banda a trauès dera fibra optica. Era Deputacion de Lhèida invertirà en aguest projècte 10 milions d’èuros annaus pendent 4 ans.

Pera sua part eth sindic d’Aran, Carlos Barrera, expliquèc qu’ua des demandes atengudes pera presidenta dera Deputacion de Lhèida a estat ua inversion de 500.000 € entad equipament deth dusau quirofan dera ampliacion der airau quirurgic der espitau dera Val d’Aran. Era inversion se realizarà mejançant eth convèni que manten era Deputacion de Lhèida damb eth departament de Salut dera Generalitat gestionat a trauès dera region sanitària der Alt Pirineu.

Eth sindic d’Aran a destacat era importanta collaboracion dera Deputacion de Lhèida damb eth Conselh Generau d’Aran en finançament deth 25% des dus programes des Hons FEDER destinadi ath projècte de melhora der accès ar entorn naturau dera Val d’Aran e eth dera implantacion dera biomasa. Barrera a soslinhat tanben era collaboracion dera Deputacion entath foment dera lengua aranesa.