Era recuelhuda dera fraccion organica s’incremente en mès d’un 40% en aguest periòde

Vielha, 23 d’hereuèr de 2017.- Es resultats deth Servici de Recuelhuda, Transpòrt e Tractament des residus municipaus ena Val d’Aran pendent er an 2016 apòrten conclusions positiues.

Era produccion de residus pes 5 fraccions tractades (envasi, papèr e carton, veire, rèsta e organic) a representat un increment de 0,49% respècte er an 2015. Era recuelhuda selectiua de residus en tot eth conjunt des materiaus a passat d’un 19,5% pendent eth 2015 ath 21% en 2016, en tot tier en compde qu’eth totau de volum des dèishes geridi peth servici de recuelhuda de residus municipaus a incrementat sonque un 0,49%, en tot passar a èster de 6.544 tn/an.

Es quantitats de residus arrecuelhudi selectiuaments an creishut de manèra fòrça importanta, en tot passar de 1.270 tones en an 2015 a 1.376 tones eth 2016, çò que represente un increment deth 8,29%.

Er increment mès notable en çò que tanh ara recuelhuda selectiua des diferentes fraccions le trapam ena fraccion organica, qu’a incrementat mès deth 40%. En çò que tanh ad aguest creishement eth conselhèr de Territòri deth Govèrn d’Aran, José Antonio Boya, a volut destacar er hèt que tot eth territòri prene consciéncia dera importància de suenhar er entorn, ua valor d’importància vitau en cas dera Val d’Aran, entath desvolopament sostenible e equilibrat des diferentes activitats economiques que s’i amien a tèrme e sustot dera activitat toristica coma principau activitat economica dera Val d’Aran.